Úıleri sýytqan óskemendikterge jylý aqysy qaıtarylmaq
27 qarasha kúni Óskemendegi jylý elektr ortalyǵynda aqaý shyqqan bolatyn. Sonyń saldarynan qala turǵyndary úılerinde jylýdyń azaıǵanyna shaǵymdandy. Kóp uzamaı JEO mamandary aqaý joıylyp, jumys shtatty rejımde júrip jatqanyn málim etti.
Alaıda áli de keı óskemendikter úıleriniń sýyq ekendigin aıtyp otyr. Belgili bolǵandaı, buǵan jelilik sý temperatýrasynyń tómendeýi sebep. «Óskemen jylý júıeleri» AQ dereginshe, JEO-da tehnıkalyq aqaýlarǵa baılanysty qarasha aıynyń sońynda jylý rejımi buzylǵan. Aıazda sý temperatýrasy 110 gradýsty quraýy tıis. Alaıda úılerdegi sý temperatýrasy 80-86 gradýsty ǵana kórsetken.
«Tutynýshylarǵa jelilik sý temperatýrasynyń tómendeýi tirkelgen naqty kúnder úshin qaıta esepteý júrgiziledi. Bul aıdyń sońǵy kúnderinde bolǵandyqtan, qaıta esepteýdi jeltoqsan aıynda júrgizemiz», - deıdi mekemeniń qarjy dırektory Alla Fateeva.