Úıleri órtenip, dalada qalǵan otbasyna nurotandyqtar qoldaý kórsetti - Qyzylorda oblysy

QYZYLORDA. QazAqparat - Tereńózek kenti, B.Momyshuly kóshesi №123 úıde órt shyǵyp, batyr ana Ábdraeva Dıdar anamyzdyń otbasy qys aıynda dalada qaldy. Aman qalýlaryna tań aldynda jylaǵan perishteniń daýysy sebep bolǵan. Ábdraeva Dıdardyń otbasynda 9 jan bar, onyń 6-aýy kishkentaı balalar bolatyn. Bul týraly QazAqparat tilshisi Syrdarııa aýdandyq ákimdigine silteme jasap habarlady.

Osy jaǵdaıǵa baılanysty jedel túrde aýdandyq Qoǵamdyq keńes otyrysy ótkizilip, aýdan ákimdiginiń, «Nur Otan» partııasynyń qoldaýymen Abdraeva Dıdardyń úıiniń aldynda «Qaıyrymdylyq - asyl qasıet» atty aktsııa uıymdastyryldy. Kóktem shyǵyp, kún jylynǵan kezde baspana máselesi túpkilikti sheshiletin bolmaq.

Aýdannyń beldi azamattary, quqyq qorǵaý organdary men mekeme ujymdary, úkimettik emes uıymdar, kásipkerler, kent turǵyndary, aǵaıyn-týystary bir kisideı aktsııaǵa qatysyp, óz kómekterin berdi. Úı máselesi sheshilip, azyq-túlik pen jyly kıimmen jáne qomaqty qarajatpen qamtyldy. Batyr ananyń otbasy músheleri aýdannyń azamattarynyń birligine rızashylyǵyn bildirdi.