Úıler men kólikterdegi kók Týdy kórip, qýanyp qalamyn – Prezıdent

ASTANA. KAZINFORM — Memleket basshysy Qasym-Jomart Toqaev Ulttyq quryltaıdyń V  otyrysynda Memlekettik rámizderdi oryndy qoldaný jóninde pikirin bildirdi.

– Patrıotızm – árıne, Otanǵa degen súıispenshilik, biraq azamattyq jaýapkershilik pen óz eline paıdaly bolýǵa umtylyssyz mundaı súıispenshiliktiń mańyzy bolmaıdy. Qazir qoǵamda «Qazaqstannyń memlekettik Týyn qaıda jáne qashan paıdalanǵan oryndy?» degen mańyzdy másele talqylanyp júr. Bul rásim arnaıy normalar men erejeler arqyly retteledi. Memlekettik rámizderdi qoldanǵanda beıqamdyqqa, salǵyrttyqqa jol berilmeıdi, - dedi Prezıdent Qyzylordada ótken V Quryltaı otyrysynda.

Sonymen birge, Prezıdent zańnyń tek mátinine emes, máni men maqsatyna da zer salý keregin aıtty. Patrıotızmdi nasıhattaý qajet, biraq memlekettik rámizderdi qoldanǵanda olardy saqtyqpen, ádepti túrde paıdalaný basty nazarda bolýy kerek.

— Men úılerde, kólikterde, kóshelerde, sondaı-aq elimizdegi, ásirese, sheteldegi sporttyq jáne basqa is-sharalarda kók Týymyz jelbirep turǵanda qýanyp qalamyn. Sol arqyly elimizdiń azamattary birligi bekem ult ekenimizdi kórsetedi. Olardyń áreketterinen týǵan elin maqtan tutatyny baıqalyp turady. Bizdiń týymyzdyń tanymal bolýynyń artynda otandyq sportshylardyń jetistikteri, ǵalymdardyń eńbekteri, kásipkerlerdiń tabysy men mýzykanttardyń jeńisi tur. Bul jetistikter tutas eldiń ıgiligine aınalyp, onyń álemdegi bedelin arttyrady, - dedi Qasym-Jomart Toqaev.

Aıta keteıik, Ulttyq quryltaıdyń V otyrysynyń mátin translıatsııasyn Kazinform saıtynan oqýǵa bolady.