«Uıqy aýrýyna» shaldyǵyp Kalachıden Astanaǵa ushaqpen ákelingen naýqastardyń jaǵdaıy jaqsardy - UǴMO
ASTANA. QazAqparat - 5 qańtar kúni Ulttyq ǵylymı medıtsınalyq ortalyq klınıkasyna sanıtarlyq avıatsııa jelisimen Kalachı selosynan ákelingen 4 naýqastyń jaǵdaı qazir qanaǵattanarlyq. Bul týraly Ulttyq ǵylymı medıtsınalyq ortalyǵynyń bas dırektory Abaı Baıgenjın aıtty.
«5 qańtarda bizdiń ortalyqqa Kalachı aýylynan ákelingen 4 naýqastyń úsheýi sol aýyldyń turǵyny, al 1-eýi 2014 jyldyń 31 jeltoqsanynda qonaqqa kelgen Reseı azamaty. Naýqastardyń ekeýi 1940 jyly týylǵan bolsa, qalǵan ekeýi 1956 jáne 1967 jylǵylar. Aýrýhanaǵa túsken kezde olardyń jaǵdaılary túrli deńgeıde boldy, bireýi jansaqtaý bólimine jatqyzyldy. Patsıentterdiń árqaısysynyń uzaq ýaqyt boıǵy syrqatnamasy bar, olardyń basym kópshiliginiń óz densaýlyǵyna nemquraıly qaraǵany anyqtaldy», - dep atap ótti A. Baıgenjın.
Onyń aıtýynsha, barlyq naýqastarǵa jiti, sozylmaly, patologııalyq sımptomdardyń ıntoksıkatsııalyq belgileriniń molekýlıarlyq mehanızmderi dıagnostıkasynyń barlyq sheńberin qamtýǵa múmkindik beretin zamanaýı zerthanalyq analızatorlarda keshendi tekserý júrgizildi. «Zertteý nátıjeleri boıynsha qandaı da bir syrtqy faktorlardyń áserin taptyq dep aıta almaımyz. Sondyqtan biz naýqastardy burynnan beri bar aýrýlaryna negizdeı otyryp emdeýdemiz. Patsıentterdiń ishki organdarynyń, tamyrlar men júıke júıeleriniń aterosklerotıkalyq buzylystarynyń túrli deńgeıdegi aýrýlary, metabolıkalyq buzylystar - qantty dıabet sııaqty aýrýlary bar. Úsh naýqastyń túrli deńgeıdegi mı qan aınalymynyń sozylmaly jetkiliksizdigi, al eki naýqastyń bas mıynyń aýyr deńgeıdegi morfologııalyq ózgeristeri anyq baıqaldy. Al tórtinshi patsıentte qan sarysýynda temir deńgeıiniń aıtarlyqtaı tómendegeni belgili boldy. Qazirgi ýaqytta barlyǵynyń jaǵdaıy jaman emes. Olardy úılerine jibere berýge bolady, degenmen biz áli de zertteýlerimizdi jalǵastyra bermekpiz», - dep túsindirdi ortalyq dırektory.
