«Uıqy aýrýy» taralǵan Kalachıge búgin qosymsha mamandar jiberildi - Salıdat Qaıyrbekova
ASTANA. QazAqparat - Aqmola oblysynyń Esil aýdany Kalachı aýylyndaǵy jappaı «uıqy aýrýyn» zertteýge qosymsha mamandar jiberildi. Bul týraly búgin Úkimet otyrysynan keıin tilshiler saýalyna jaýap berý kezinde QR Densaýlyq saqtaý mınıstri Salıdat Qaıyrbekova málim etti.
«Komıssııa quramy keńeıtilip jatyr. Bilikti mamandardy jumyldyryp jatyrmyz. Osy másele boıynsha keshe Kalachı aýylynda júrgen densaýlyq saqtaý basqarmasy qyzmetkerlerimen selektorlyq keńes ótkizip, qosymsha qajet mamandar jaıynda talqyladyq. Osy oraıda búgin bul mamandar jolǵa shyqty. Osy zertteýlerdiń nátıjesi belgili bolǵannan keıin, biz barlyǵyn jarııalaıtyn bolamyz»,- dedi mınıstr. Onyń aıtýynsha, aýyldaǵy zertteý jumystarynyń keıbir synamalary biraz ýaqytty qajet etedi. «Aýyldaǵy jaǵdaıdyń sebebi ártúrli bolýy múmkin. Sondyqtan da nátıjeler belgili bolǵan soń, arnaıy bapasóz máslıhaty ótkiziledi»,- dep toqtaldy S. Qaıyrbekova. 12 naýryzda QR Densaýlyq saqtaý mınıstrliginiń baspasóz qyzmetinen Kalachı aýylynda komıssııanyń jumysy barysynda shamamen 500 ret aýa quramy, 760 ret radıatsııalyq fon ólshemderi saraptamadan ótkizgenin, tamaq, sý jáne adam aǵzasyna áser etetin qorshaǵan ortanyń ózge de faktorlary tekserilgeni habarlady. Sonymen qatar bıologııalyq materıaldardyń (tyrnaq, shash) 29 úlgisi zertteldi. Barlyq kórsetkishter qalypty deńgeıden aspaǵandyǵyn kórsetti. Vedomstvo málim etkenindeı, 680 turǵyny bar Kalachı aýylynda 2013 jyly naýryzda alǵash ret tirkelgen oqıǵalardan keıin, mınıstrlik bul jaǵdaıdy tolyq baqylaýda ustaýda. Osy ýaqytqa deıin 33 adam osy aýrý belgileri boıynsha aýrýhanaǵa habarlasqan. «Atalmysh belgiler ótkinshi sıpat alady. 2-3 kúnnen keıin olar joǵalady, patsıentter ózderin jaqsy sezinedi», - dep habarlaıdy atalmysh mınıstrlik qyzmetkerleri.
