Uıqyńyz qanbasa, ımmýnıtet tómendeıdi

Sapaly ómir súrip, kóńil-kúı kóterińki, oqý men jumys nátıjeli bolýy úshin aǵzaǵa qajet dúnıe - uıqy. Siz qansha saǵat uıyqtaısyz? Neshede uıyqtaısyz? Ýaqytynda uıyqtaýdyń mańyzy týraly «Jibek joly» arnasyndaǵy «Bizdiń dáriger» jobasyna kelgen endokrınolog dáriger Mahabbat Ibragımqyzy túsindirdi, dep habarlaıdy Kazinform. 

Uıqynyń qanbaýynan júrek-qan tamyr aýrýlary týyndaýy múmkin. Sonyń kesirinen qant dıabetiniń 2 tıpi men semizdik týyndaıdy.

Negizinen uıqy qanbaǵan kezde ashtyq sezimin týǵyzatyn grelın gormony túziledi. Sol sebepti adam mólsherden tys tamaq jep qoıady. Al melatonın — uıqy gormony. Ol qarańǵy túskende túziledi. Melotonın qan qysym men dene temperatýrasynyń tómendeýine sep bolyp, aǵzany tynyshtandyrady. Biraq biz qarańǵy túsken soń úıde jaryqpen otyrsaq onyń túzilýi baıaýlaıdy. Sondyqtan melotonın gormonynyń ornyna stress gormony kortızol kóp mólsherde bólinip adamnyń uıqysy qashady.

Eger adam bes saǵattan az uıyqtasa, vırýstyq ınfektsııany juqtyrý qaýpi artady. Qalypty jaǵdaıda eresekter 7-8 saǵat, al balalar 9-10 saǵat uıyqtaýy qajet. Bul ortalyq júıke júıesiniń jasýshalaryn qalpyna keltirip, ımmýnıtetti nyǵaıtady.

Baǵdarlama júrgizýshisine endkorınolog dáriger uıqy qanbasa, mıdyń keı bólikteriniń qyzmeti nasharlaıtynyn sonyń kesirinen adam oıdy júıeleı almaı, tipti kórý qabileti de tómendeýi múmkindigin aıtty.

«Uıqy qanýy úshin jatar aldynda aýyr, maıly tamaq jemeńiz, qarańǵy jáne tynysh jerde uıyqtańyz. Uıqyǵa belgili bir ýaqytta jatyp, bir ýaqytta oıanýdy ádetke aınaldyryńyz. Uıqy aldynda dalaǵa shyǵyp serýendeý de paıdaly. Sondaı-aq uıqy aldynda kemi 1 saǵat gadjet paıdalanbaı, jatyn bólme temperatýrasyn qadaǵalaǵaan abzal», — deıdi Mahabbat Ibragım.