Úıirli shegirtkeler sany azaıyp keledi
ASTANA. QazAqparat - QR Aýyl sharýashylyǵy mınıstrliginiń sarapshylary shegirtkemen kúres boıynsha atqarylǵan sharalar jóninde baıandady, dep habarlaıdy «QazAqparat» HAA tilshisi.
«Bizdiń fıtosanıtarııalyq qyzmetter únemi baqylaý júrgizedi jáne kelesi jylǵa boljam jasaıdy. Qazirgi ýaqytta asa qaýipti zııandy aǵzalarmen kúres boıynsha fıtosanıtarlyq jaǵdaı turaqty, úıirli shegirtkelerdiń kólemi azaıyp keledi», - dep atap ótti QR AShM Agroónerkásiptik keshendegi memlekettik ınspektsııa komıtetiniń tóraǵasy Erjan Aınabekov.
AShM ókilderiniń aıtýynsha, bıyl asa qaýipti zııandy aǵzalar 4,5 mln ga aýmaqqa taralady dep boljanǵan jáne oǵan respýblıkalyq bıýdjetten 4,5 mlrd teńge aqsha bólingen. 1,5 mlrd teńge úıirli shegirtkelerge qarsy kúreske, al 1,9 mlrd teńge astyqtyń asa zııandy aýrýlaryna qarsy baǵyttalǵan.
«Úıirli shegirtkelerge qarsy barlyq pestıtsıdter satyp alyndy. Hımııalyq óńdeýlerge 300-den astam búrký tehnıkalary jumyldyryldy. Respýblıka boıynsha úıirli shegirtkelerge qarsy negizgi jumystar aıaqtaldy, jalpy kólemi 1, 8 mln ga aýmaqqa hımııalyq dárileý jumystary júrgizildi. Barlyq tıisti sharalar der kezinde jasalyp, zııankesterden aýylsharýashylyq ónim óndirýshilerge esh shyǵyn kelgen joq», - dep tolyqtyrdy E. Aınabekov.
Sonymen birge, Aınabekov bıyl shegirtkemen kúreste elimizdiń ońtústigine erekshe nazar aýdarylǵanyn atap ótti.
«Ońtústik Qazaqstan jáne Jambyl oblystarynda shegirtkeler kóbeıedi dep boljanyp otyr. Bul bıologııalyq belsendilikpen jáne aýa raıy jaǵdaıymen tikeleı baılanysty, ıaǵnı árbir 8-9 jyl saıyn bul óńirlerde marokkolyq shegirtkelerdiń sany kúrt artady. Rezervtik qordan qarajat bólinip, Jambyl jáne Ońtústik Qazaqstan oblystarynda hımııalyq óńdeý jumystary júrgizildi. Bul máselede jergilikti atqarý organdary úlken kúsh saldy. Sodan bolar, aýylsharýashylyq egistikterine zaqym kelý oqıǵasy tirkelgen joq», - dep óz sózin túıindedi komıtet tóraǵasy.
