Úıinen ketip qalǵan jasóspirim qyz 4 kúnnen keıin tabyldy
LEŃGІR. QazAqparat - Túrkistan oblysynda iz-túzsiz joǵalyp ketken jasóspirim qyz 4 kúnnen keıin tabyldy. Kámelet jasyna tolmaǵan qyz mundaı qadamǵa ata-anasymen urys-keristen soń barǵanyn aıtqan, dep habarlaıdy QazAqparat tilshisi.
Oblystyq PD málimetinshe, jasóspirim qyzdyń joǵalǵany týraly polıtsııaǵa Leńgir qalasynda turatyn ata-anasy habar bergen. Olar qyzdarynyń 26 sáýir kúni saǵat 16:30 shamasynda úıinen belgisiz baǵytqa shyǵyp ketip, qaıta oralmaǵanyn aıtqan. Keıinnen habarlasyp, qurbysynyń úıinde ekenin jáne erteń úıine qaıtatynyn jetkizgen. Alaıda sodan keıin úıine de kelmegen, baılanysqa da shyqpaǵan.
«Onyń mekenjaıyn anyqtaý maqsatynda polıtsııa bóliminde jedel-izdestirý toby qurylyp, jumystar júrgizilgen. Jasóspirim qyzdyń barýy múmkin degen jerler tekserilip, kýágerlerden jaýap alynǵan. Nátıjesinde joǵalǵan qyzdyń júrgen jeri anyqtalyp, Shymkent qalasynan tabyldy. Ol óz jaýabynda ata-anasymen urys-keristen soń, Shymkent qalasyna ketkenin aıtqan. Tıisti sharalardan soń joǵalǵan qyz úıine oraldy»,- delingen habarlamada.
