Úıine qonaq shaqyrǵan aqtóbelik qamaýǵa alyndy
AQTÓBE. QazAqparat – Úıine qonaq shaqyrǵan Aqtóbe qalasynyń 30 jastaǵy turǵyny qamaýǵa alyndy, dep habarlaıdy QazAqparat tilshisi.
Tótenshe jaǵdaı rejımi engizilgen kúnnen beri óńirde barlyǵy 853 quqyqbuzýshylyq tirkeldi. Ákimshilik quqyqbuzýshylyq týraly Kodekstiń «Tótenshe jaǵdaı rejımin buzý» baby boıynsha 168 adam qamaldy. Sonymen birge 200-den astam adamǵa aıyppul salyndy. Beıbereket kóshede júrgen 400 adamǵa eskertý berildi. Al «Tótenshe jaǵdaıda quqyq tártibin buzýǵa ıtermeleıtin is-áreketter» baby boıynsha 18 adam qamalǵan. Sotqa jiberilgen materıaldar da bar. Polıtsııa blokposttardy aınalyp ótpek bolǵan adamdardy áli anyqtap jatyr. Barlyǵy óńirde 38 derek tirkelgen.
«Polıtsııa qyzmetkerleri «Qurmysh» shaǵynaýdanynda turatyn 30 jastaǵy er adamnyń karantın rejımine qaramastan óz úıinde qonaq qabyldaǵanyn anyqtady. Páter ıesi men onyń 3 qonaǵyna QR ÁQBtK-niń 476-baby 6-tarmaǵy boıynsha ákimshilik hattama toltyryldy. Ákimshilik sot olardy 2 jáne 3 táýlikke ákimshilik qamaýǵa aldy», - dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, qala ishinde júrýge ruqsat qaǵazy joq 130-dan astam júrgizýshiniń kóligi aıyp turaǵyna qoıyldy. Qala turǵyndary el ishindegi shekteýlerbi qatań saqtaýǵa, úıde otyrýǵa keńes beredi.
