Úıine gaz tarttyrý úshin 700-den astam elordalyq zeınetkerge qarjylaı kómek kórsetilgen

ASTANA. QazAqparat – Úıine gaz qosý úshin 700-den astam elordalyq zeınetkerge qarjylaı kómek berildi. Bul týraly bas shahardyń kommýnıkatsııalar qyzmetinde ótken brıfıngide Astana qalalyq Jumyspen qamtý jáne áleýmettik qorǵaý basqarmasy basshysynyń orynbasary Aıgúl Talasova aıtty, dep habarlaıdy QazAqparat tilshisi.

«Jumyspen qamtý ortalyǵy jáne qala ákimdigi áleýmettik osal toptaǵy 185 myń adamǵa ártúrli kómek kórsetedi. Qalamyzda 110 myńnan astam zeınetker turady. Osy sanatqa birneshe kómek kórsetilýde. Ol – shıpajaılyq emdelý, tegin jol júrý, qarttar kúnine arnalǵan 2,5 AEK (8 625 teńge) mólsherinde kórsetiletin kómek bar. Sonymen qosa, qatty otyn satyp alýǵa 55 200 teńge jáne zeınetkerlerdiń úıine gaz qosý boıynsha 448 500 teńge kómek beremiz. Gazdandyrý boıynsha kómek qazirgi tańda 700-den astam zeınetkerge kórsetildi», - dedi Aıgúl Talasova.

Onyń aıtýynsha, egde jastaǵy jalǵyzbasty elorda turǵyndaryna turǵyn úı kommýnaldyq qyzmetteri boıynsha qarjylaı qoldaý jasalady.