Úıindilerde Qazaqstannyń «ekinshi baılyǵy» jatyr - QR Prezıdenti
ASTANA. QazAqparat - Úıindilerde Qazaqstannyń «ekinshi baılyǵy» jatyr. Búgin Aqordada Ál-Farabı atyndaǵy ǵylym men tehnıka salasyndaǵy syılyqty tabystaý rásiminde Elbasy Nursultan Nazarbaev osylaı dedi.
«Árıne, bizdiń jer qoınaýymyz óte baı. Mıllıondaǵan tonna ken qazyp aldyq. Biraq, úıindilerde, qorlarda jatqan qaza baılyǵy da mol. Ýaqyty kelgende biz olardy da qaıta óńdeıtin bolamyz. Ony jaqsy bilemin, ol meniń keńes zamanynda Máskeýde qorǵaǵan doktorlyq dısertatsııam bolatyn. Tek Sokolov-Sarybaı kombınatynyń úıindilerinde júzdegen mıllıon tonna temir, vanadıı, volfram syndy qazbalar bar. Al Ekibastuz úıindilerinde alıýmınıı totyǵy bar. Biz keıin ony óndiretin bolamyz», - dedi N.Nazarbaev.
Elbasy «QR Mıneraldy shıkizatty keshendi qaıta óńdeý jónindegi ulttyq ortalyǵy» ujymyn búgingi syılyqtarymen quttyqtaı kele, olardyń zor is tyndyryp jatqanyn basa aıtty. Óıtkeni, ken úıindilerinde Qazaqstannyń «ekinshi baılyǵy» jatyr.
Aıta keteıik, «Álemdik tehnologııa naryǵynda Qazaqstannyń mártebesin kótergen jáne elimizdiń ınnovatsııalyq damýyna eleýli úles qosqan altyn men qorǵasyn metallýrgııasy salasynda jasalǵan ázirlemelerdi óndiriste iske asyrý» taqyrybyndaǵy jumystar tsıkli úshin QR IDM Indýstrııalyq damý jáne ónerkásiptik qaýipsizdik komıteti «QR Mıneraldy shıkizatty keshendi qaıta óńdeý jónindegi ulttyq ortalyǵy» RMK-nyń bas dırektory, tehnıka ǵylymdarynyń doktory, professor, QR UǴA akademıgi, Ábdirásil Jármenov, atalǵan ortalyq fılıalynyń zerthana meńgerýshileri, hımııa ǵylymdarynyń kandıdaty Lıýdmıla Bolotova, tehnıka ǵylymdarynyń doktory, professor Saǵyntaı Isabaev, ǵylymı qyzmetkeri, tehnıka ǵylymdarynyń kandıdaty, dotsent Qanat Kúzgibekova, fılıal dırektory Igor Startsev, bas ǵylymı qyzmetkeri, tehnıka ǵylymdarynyń kandıdaty Nıkolaı Ýshakov, fılıal dırektory, dotsent Serikbol Shalǵymbaev, fılıal dırektorynyń orynbasary, tehnıka ǵylymdarynyń kandıdaty Vıktor Shýmskıı «Ál-Farabı» atyndaǵy syılyqqa ıe bolǵan edi.
