Úıindi astynda qalǵan kenshiler 36 kúnnen soń qutqaryldy
ASTANA. QazAqparat - Apattan soń 36 kún úıindi astynda qalǵan eki qytaılyq kenshi qutqaryldy, dep habarlaıdy qytaılyq BAQ-tar.
Bulardan basqa taǵy eki kenshi jer astynda qalyp otyr.
Qytaılyq telearnadan er adamdardyń qalaı joǵaryǵa shyqqany, artynsha olardy aýrýhanaǵa alyp ketkeni kórsetildi.
Eske sala ketsek, Shandýn provıntsııasyndaǵy shahta 25 jeltoqsanda opyrylyp qulaǵan edi. Apat bolǵan kezde jer astynda 29 adam jumys istep jatqan.
Eki kúnnen soń shahtanyń ıesi, Yurong kompanııasynyń basshysy kenish oqpanynan sekirip, ajal qushty.
Bir aı buryn qutqarýshylar apattan soń úıindi astynda qalǵan birneshe kenshini anyqtap, olardyń kópshiligin joǵaryǵa shyǵarǵan bolatyn, dep habarlaıdy Bı-bı-sı.
