Úıinde myńdaǵan kitap shań basyp jatqan zııaly qaýym Myrzataı aǵamyzdan úlgi alsa durys bolar - B.Saparbaev
Akademık Myrzataı Joldasbekov kitaphanasynyń qorynda 6 641 dana (5685 atalym) kitap pen kitapsha bolsa, sonyń ishinde: 1041 dana kitap belgili qalamgerler, aqyndar jáne dıplomattar qoltańbasymen, 773 dana (690 atalym) orys tilindegi kitaptar, 415 memorıaldyq eksponattar (kádesyılar, portretter, dıplomdar, sertıfıkattar, medaldar, monetalar, t.b.), 908-i (368 atalym) aýdıo, beınematerıaldar, gramplastınkalar. Osylaısha, jalpy alǵanda 9 526 danamen (8162 atalym) kitaphana qory tolyǵatyn boldy. Sonymen qatar, M. Joldasbekov jeke qoryndaǵy qazaq jáne basqa da halyqtardyń ulttyq aspaptarynyń biregeı toptamasyn (dombyra, jetigen, garmon, t.b.) Ulttyq akademııalyq kitaphanaǵa tapsyrdy.
Saltanatty rásimge qatysqan QR Premer-Mınıstriniń orynbasary Berdibek Saparbaev qazaqtyń tarıhy, mádenıeti, tili men ǵylymyn damytýdaǵy Myrzataı Joldasbekovtyń ushanteńiz eńbegine toqtala kele, mundaı aıtýly oqıǵa Astanada ǵana emes, Qazaqstannyń ózge oblystarynda jalǵassa degen tilegin jetkizdi. «Kóptegen zııaly qaýymnyń úıinde myńdaǵan kitap shań basyp jatyr. Sol kisiler Myrzataı aǵamyzdan úlgi alsa durys bolar edi. Óıtkeni, osyndaı ıgi sharanyń arqasynda elimizde kitap oqıtyn, sol kitap arqyly óziniń mádenıetin, bilimin jetildiretin jastardyń qatary arta túsetin edi», - deıdi Berdibek Saparbaev.