Úıinde kisi óltirildi dep qaljyńdaǵan petropavldyq aıyppul tóleıdi
PETROPAVL. QazAqparat – Petropavlda 48 jastaǵy áıel arnaıy qyzmetterdi jalǵan habarmen shaqyrǵany úshin 80 myń teńge aıyppul tólemek, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 48 jastaǵy qala turǵyny «102» nómirine habarlasyp, óz úıinde kisi óltirilgenin aıtqan. Oqıǵa ornyna birden tártip saqshylary jóneltildi. Alaıda jolda olar aqparat rastalmaǵandyqtan keri qaıtty.
«Áıel bizge qaıta habarlasyp, kisi óliminiń bolmaǵanyn, onyń ótirik ekenin aıtty. Kórsetilgen mekenjaıǵa ýchaskelik polıtsııa ınspektory jiberildi», - deıdi Petropavl qalalyq polıtsııa basqarmasynyń ekinshi bólim bastyǵy Rýslan Syzdyqov.
Ýchaskelik polıtsııa qyzmetkeri kelgende páterde mas áıelden basqa eki er adam bolǵan. Úı ıesi adam ólimi jaıynda polıtsııaǵa jalǵan habar berip, ázildemek bolypty. Onyń naýryz aıynda da osylaısha orynsyz «ázildegeni» anyqtaldy. Sol joly jazaǵa tartylsa da, odan sabaq almaǵan syńaıly. Endi ol 80 myń teńge aıyppul tólemek.
SQO-da jyl basynan arnaıy qyzmetterdi kórineý jalǵan shaqyrý boıynsha 327 derek tirkeldi.
