Úıinde ınterneti joq almatylyq muǵalimder onlaın sabaqty mektepte ótkize alady
ALMATY. QazAqparat – Úıinde ınterneti joq almatylyq muǵalimder onlaın sabaqty barlyq sanıtarlyq talapty saqtaı otyryp, mektepte ótkize alady, dep habarlaıdy QazAqparat tilshisi.
Almaty qalalyq Bilim basqarma basshysy Lázzat Jylqybaeva onlaın brıfıng barysynda jańa oqý jylyna daıyndyq jumystary qalaı júrgizilip jatqanyn aıtyp berdi.
Onyń aıtýynsha, 1 qyrkúıekten bastap oqýshylar qashyqtan oqý formatynda bilim alady. Sondyqtan oqýshylardy tehnıkamen qamtýǵa kóńil bólýde.
«Bul máseleni sheshý úshin mektepter jan basyna qarjylandyrý esebinen 9 120 noýtbýkpen qamtamasyz etiledi. Sondaı– aq,mektepterdegi 10 myń noýtbýk ýaqytsha paıdalanýǵa berildi. Jergilikti bıýdjet esebinen 11 042, Úkimettiń rezerv qory esebinen 38 591 kompıýter tehnıkasy alyndy. Onyń ishinde 4 016 kompıýter, 5 203 planshet jáne 29 372 noýtbýk bar. 22 212 planshet jergilikti bıýdjet esebinen alyndy», - dep atap ótti Lázzat Jylqybaeva.
Sonymen qatar, ol oqýshylar men muǵalimderdiń ınternetke qoljetimdiligin sheshý kezeń-kezeńimen atqarylyp jatqanyn jetkizdi.
Internetke qosylýdy qajet etetin 22 myńnan astam oqýshyǵa sım kartalar satyp alyndy. Qazirgi tańda sım kartalar men roýterler taratylyp berildi. Interneti joq muǵalimderge mektepke kelip onlaın sabaq ótkizýge ruqsat berildi. Osyǵan baılanysty qaladaǵy mektepterdiń barlyǵy dezınfektsııalyq quraldarmen qamtamasyz etildi. Odan bólek 1-2 synyptarda 193 kezekshi toptar ashyldy. Bul toptarda 1977 bala sabaq oqıdy, - dedi ol.
