Úıinde gaz ballony jarylǵan aqtóbelik otbasy baspanasyz qaldy
AQTÓBE. QazAqparat -Aqtóbedegi saıajaılardyń birinde gaz ballony jarylyp, úı qırap qaldy. Al úı ıesi aýrýhanaǵa tústi, dep habarlaıdy QazAqparat tilshisi.
Aqtóbede gaz ballony bir otbasyn baspanasyz qaldyrdy. Úı ıesi 5 lıtrlik gaz ballonyn jylytý úshin úıge kirgizip, dálizge qoıdy. Sol kezde gaz jarylyp, otaǵasy ony dalaǵa laqtyryp úlgeredi. Al jarylys saldarynan úıdiń shatyry ortasyna túsip, qabyrǵasy qırap qaldy.
«Gúrs etken dybysty estigende dalada oq atyldy dep oılaǵan edik. Sol sátte tereze ózimizge qaraı qulady. Ákem «Shyǵyńdar, gaz ballony jaryldy» dep aıqaılady. Bárimiz qasha jóneldik», - dedi Ásel Omarova.
Oqys oqıǵa kezinde úıdiń ıesi aýrýhanaǵa jetkizildi. Dárigerler onyń jaǵdaıy ortasha aýyr dep otyr.
«Beti, eki qolyn kúıik shaldy. І-ІІ dárejeli kúıik. Jaǵdaıy ortasha aýyr, turaqty. Ol taǵaıyndalǵan emdi alyp jatyr»,- dedi travmatolog dáriger Ádilbek Qarajanov.
Al úı turýǵa jaramsyz bolyp qaldy. Esik-terezesi qıraǵan soń Omarovtar otbasy týǵan-týystaryn jaǵalap ketti. Otbasy aqtóbelikterden kómek surap otyr.
