Úıin jezókshelikpen aınalysýshylarǵa jalǵa bergender jaýapqa tartylady - Májilis
ASTANA. 19 maýsym. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine adam saýdasyna qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Zań jobasynyń maqsaty adam saýdasyna qarsy is-qımyl salasyndaǵy zańnamany jetildirý bolyp tabylady. Osy saladaǵy qylmystardan jábirlenýshilerdiń, onyń ishinde kámeletke tolmaǵandardyń quqyqtary men múddelerin halyqaralyq quqyqtyq normalarǵa sáıkes qorǵaý bóligi jetildiredi.
Bul rette adam saýdasyndaǵy qylmystar, onyń ishinde jumys berýshiniń kámeletke tolmaǵandarǵa qatysty eńbek zańnamasyn buzǵany, úı-jaı ıeleri men ony jalǵa alýshylardyń jezókshelikpen aınalysýǵa nemese jeńgetaılyqqa úı-jaı bergeni úshin jaýapkershilik kúsheıtiledi. Sonymen qatar, jezókshelikpen aınalysýǵa tartqandary, prıtondardy uıymdastyryp nemese ustaǵandary úshin jaýapkershilik qataıady.
Budan bólek, zań jobasymen densaýlyq saqtaý sýbektileriniń jańa jaraqattar, jaralaný, krımınaldyq túsikter boıynsha, aınalaǵa qaýip tóndiretin ınfektsııalyq aýrý jaǵdaılary boıynsha kelip kóringen adamdar týraly ishki ister organdaryna habarlaý jónindegi mindettemeni buzǵandarǵa ákimshilik jaýapkershilik belgilenedi. Mundaı jaýapkershilik tótenshe jaǵdaılardyń medıtsınalyq-sanıtarııalyq saldarynyń paıda bolý qateri týraly tótenshe jaǵdaılar organyna habarlaý mindetin júzege asyrmaǵandarǵa da qarastyrylady.
