Uıymdastyrýshylar Djeı Lonyń kontsertine qatysty jańa málimdeme jasady

ASTANA. KAZINFORM — Búginde latynamerıkalyq juldyz Djennıfer Lopestiń elordada ótetin kontsertine bılet tolyq satyldy.

— Sońǵy birneshe kúnde bizdiń komanda ár jaǵdaıdy jeke qarap shyqty, oryndarǵa qaıta otyrǵyzyp, satyp alýshylarmen baılanysyp, ár máseleni sheshýge tyrystyq. Qazir Djennıfer Lopestiń kontsertine arnalǵan bıletterdiń barlyǵy satyldy, bizge berilgen kvota tolyqtaı taýsyldy, bos bılet joq, — deıdi uıymdastyrýshylar.

Osy oraıda kontsertti uıymdastyrýshylar kelesideı sheshim qabyldady: 

— Bıletti satyp alyp, biraq vaýcher almaǵan klıentter úshin ókinishke qaraı, oryn qalmady. Sol sebepti, bılet qunyn tolyq qaıtarady jáne qosymsha sol soma kóleminde (100%) qarajatty ıesine qaıta aýdarady. Aqshany qaıtarý ýaqyty bank qyzmetine baılanysty, ıaǵnı 3 jáne 10 jumys kúnine deıin.

— Eger bılet sol baǵadaǵy basqa orynǵa nemese bıleıtin alańǵa aýystyrylsa, yńǵaısyzdyq úshin bılet qunynyń 50% ótemaqy retinde tólenedi.

— Eger bılet arzanyraq orynǵa aýystyrylsa, tolyq qaıtarym jasalady jáne kontsertke tegin kiredi.

— Aldaǵy táýlikte barlyq klıentke tapsyrystyń mártebesi týraly SMS-habarlama jiberiledi. Bul jaǵdaı bizge úlken sabaq boldy, aldaǵy ýaqytta mindetti túrde ońtaılandyramyz, — dep túsindirdi uıymdastyrýshylar.

Aıta keteıik, bıyl 1 tamyzda álemge tanymal pop-juldyz Djennıfer Lopes Astanada kontsert beredi.

Keıin áleýmettik jelide Djeı Lonyń kontsertine Qazaqstanǵa týrlar satylyp jatqany aıtyldy. 

Artynsha uıymdastyrýshylar deldal satqan bıletpen Djeı Lo kontsertine kire almaıtynyn jáne zańsyz satýǵa qatysty tekserý jumystary bastalǵanyn málimdedi. 

Sondaı-aq uıymdastyrýshylar Djennıfer Lopestiń kontsertine qaıtalanyp satylǵan bıletterdiń qunyn óteýge berdi. 

Búgin astanalyq jankúıerlerdiń bıi Djeı Lonyń nazaryna ilikti.