Uıymdasqan qylmystyq toptyń 50-den astam múshesi jaýapqa tartylyp jatyr - ІІM
ASTANA. KAZINFORM- Іshki ister mınıstrligi júrgizgen jedel is-sharalar barysynda qylmystyq toptardyń áreketine baılanysty 50-den astam adam qylmystyq jaýapkershilikke tartylýda. Zańsyz aınalymnan 10-nan astam atys jáne travmatıkalyq qarý, sondaı-aq olarǵa tıesili oq-dáriler tárkilendi.
Sonymen qatar der kezinde qabyldanǵan sharalardyń arqasynda jábirlenýshilerdiń 77 mln teńgeden astam qarajatyn ıemdenýge jol berilmedi, dep habarlaıdy Polisia.kz.
«Zań men Tártip» qaǵıdatyn iske asyrý jáne azamattardyń qaýipsizdigin qamtamasyz etý maqsatynda Іshki ister mınıstrligi aýyr qylmystardyń aldyn alýǵa, qylmystyq toptardyń áreketiniń jolyn kesýge jáne qoǵamdyq qaýipsizdikke tónetin qaterlerge jol bermeýge baǵyttalǵan birqatar júıeli jedel is-sharalar júrgizip jatyr.
Qyrkúıek aıynda Astana, Óskemen qalalarynda jáne Almaty oblysynda 40 mln teńge kóleminde aqsha talap etti degen kúdikpen jeti adam ustaldy. Olardyń úsheýi buryn sottalǵan, onyń ishinde adam óltirgeni úshin sottalǵandar da bar.
Tintý barysynda kúdiktilerden atys jáne sýyq qarý, oq-dáriler, sondaı-aq birneshe qymbat avtokólik tabylyp, tárkilendi.
Quqyqqa qaıshy áreketterdi anyqtaý jáne jolyn kesýge baǵyttalǵan osyndaı is-sharalar Astana men Shymkent qalalarynda, sondaı-aq Aqtóbe, Atyraý, Abaı, Aqmola, Shyǵys Qazaqstan, Batys Qazaqstan, Qaraǵandy jáne Mańǵystaý oblystarynda júrgizildi.
Qazirgi ýaqytta qylmystyq ister boıynsha qajetti tergeý áreketteri júrgizilip jatyr. Zańsyz áreketterge qatysy bar basqa da adamdardy anyqtaý jáne jaýapqa tartý boıynsha sharalar qabyldaný ústinde.
Іshki ister mınıstrligi azamattar men qoǵamdyq qaýipsizdikke qaýip tóndiretin qylmystardyń aldyn alý jáne olardyń jolyn kesý jumystaryn jalǵastyrýda. Qylmystyq toptardy der kezinde anyqtaýǵa, olardyń áreketiniń jolyn kesýge jáne jańa quqyq buzýshylyqtardyń jasalýyna jol bermeýge erekshe kóńil bólinip otyr.
«Zań men Tártip» qaǵıdaty kinálilerdi jaýapkershilikke tartýdy ǵana emes, sonymen qatar quqyq buzýshylyqtardyń aldyn alýdy júıeli túrde júzege asyrýdy, azamattardy qorǵaýdy jáne qaýipsiz orta qalyptastyrýdy kózdeıdi. Іshki ister organdarynyń osy baǵyttaǵy jumysy turaqty negizde jalǵasa beredi, – dedi ІІM uıymdasqan qylmysqa qarsy kúres departamentiniń ókili Qýandyq Alpys.
Aıta keteıik, bıyl elimizde qylmystyń jalpy deńgeıi 10%-ǵa tómendedi.
