Uıymdasqan qylmystyq top múshelerine qatysty 45 qylmystyq is sotqa joldandy — ІІM
ASTANA. KAZINFORM — Jyl basynan beri uıymdasqan qylmystyq top múshelerine qatysty 45 qylmystyq is sotqa joldandy. Birqatar is boıynsha aıyptylar 17 jylǵa deıin bas bostandyǵynan aıyryldy. Bul týraly Polisia.kz jazdy.
ІІM uıymdasqan qylmystyq toptardyń quramynda jasalǵan qylmystar úshin jazanyń bultartpastyǵy qaǵıdatyn qamtamasyz etýge baǵyttalǵan sharalar keshenin dáıekti túrde iske asyryp jatyr.
— Osy jumys aıasynda qylmystyq áreketke qatysýshylardyń barlyǵyn anyqtaý, olardyń quqyqqa qaıshy áreketterin qujattaý jáne qylmystyq isterdi sotqa deıin jetkizý boıynsha sharalar qabyldanyp jatyr. Júrgizilip jatqan jumystyń negizgi nátıjeleriniń biri — tergeýlerdi aıaqtap, kináli tulǵalardy zańda belgilengen jaýapkershilikke tartý máselesin sheshý úshin qylmystyq isterdi sotqa joldaý, — delingen habarlamada.
Bıyl uıymdasqan qylmystyq toptardyń múshelerine qatysty 45 qylmystyq is sotqa joldandy. Máselen, Qaraǵandy oblysynda óńirdegi taý-ken baıytý kásiporyndarynan taýarlyq-materıaldyq qundylyqtardy urlaýmen aınalysqan qylmystyq qoǵamdastyqtyń uıymdastyrýshysy men 10 qatysýshysyna qatysty sot úkimi jarııalandy.
Mınıstrliktiń málimetinshe, sot olardy 13 jylǵa deıin bas bostandyǵynan aıyrý jazasyna kesken. Sondaı-aq oblystaǵy iri qala quraýshy kásiporyn aýmaǵynan múlikti jasyryn alaıaqtyq shemalaryn paıdalana otyryp urlaýdyń osyndaı faktilerine qatysy bar UQT basshysy men tórt qatysýshysyna qatysty aıyptaý úkimi shyǵaryldy. Olarǵa 10 jylǵa deıin bas bostandyǵynan aıyrý jazasy taǵaıyndaldy.
Almaty qalasynda avtokólikterdi zańsyz tirkeýge, VIN-kodtar men aqparattyq júıelerdegi derekterdi ózgertýge, sondaı-aq avtokólikterdi satý kezinde alaıaqtyq jasaýǵa qatysy bar UQT-nyń 13 múshesi 8 jylǵa deıingi uzaq merzimge bas bostandyǵynan aıyrý jazasyna sottaldy.
Elordada esirtki zattaryn ótkizgeni úshin UQT uıymdastyrýshysy men 5 qatysýshysy sottaldy. Uıymdastyrýshy 17 jylǵa bas bostandyǵynan aıyrylsa, onyń sybaılastaryna 16 jylǵa deıingi merzimge jaza taǵaıyndaldy. Qyzylordada júıeli túrde, onyń ishinde kásipkerlerden aqsha bopsalaǵany úshin jergilikti qylmystyq ortanyń 8 ókili sottaldy.
Tergeý barysynda olarǵa UQT qyzmetine basshylyq etý jáne oǵan qatysý aıyptary taǵyldy. Sot úkimimen 11 jylǵa deıin bas bostandyǵynan aıyrý jazasy taǵaıyndaldy.
Eske sala keteıik, buǵan deıin 10 óńirdegi uıymdasqan qylmysqa qarsy operatsııa júrgizilgenin jazdyq.
