Uıyqtamaıtyn qala: Almatyda 24 saǵat jumys isteıtin kitaphanalar sany artady
ALMATY. KAZINFORM – Aqpan aıynan bastap Almaty qalasyndaǵy taǵy 2 kitaphana 24/7 rejıminde jumys isteýge kóshedi.
Almaty qalasy mádenıet basqarmasynyń basshysy Danııar Alıevtiń aıtýynsha, búgingi tańda basqarmaǵa qarasty Almaty qalasy ortalyqtandyrylǵan kitaphana júıesine 31 qalalyq kitaphana kiredi. Barlyq kitaphanadaǵy jalpy kitap qory 1 372 423 danaǵa jetken.
– Qalalyq kitaphanalar zamanaýı talaptarǵa saı jańaryp, turǵyndar úshin qoljetimdi mádenı ári zııatkerlik keńistikke aınalyp keledi. 2025 jyly kitaphanalarǵa kelýshiler sany shamamen 3,1 mln bolsa, al turaqty oqyrmandar sany 300 myńnan asty, - dedi Danııar Alıev.
Qazirgi tańda Jambyl atyndaǵy jasóspirimder kitaphanasy, Alatau Creative Hub jáne Muhtar Áýezov atyndaǵy kitaphana táýlik boıy qyzmet kórsetedi. Aqpan aıynan bastap olardyń qatary kóbeıip, Qazaqstan jazýshylar kitaphanasy men Rozybakıev kóshesi, 247 mekenjaıynda ornalasqan fılıal táýlik boıy jumys isteýge kóshedi.
Sonymen qatar qalada kitaphana qyzmetiniń qoljetimdiligin arttyrý maqsatynda saýda ortalyqtarynda, metro stantsııalarynda, mektepterde, kovorkıngter men kommýnaldyq ortalyqtarda 32 derbes ózine-ózi qyzmet kórsetý kitaphanasy ornatylǵan. Bul núktelerdi 300-ge jýyq turaqty oqyrman paıdalanady, aı saıyn 500-den astam kitap beriledi.
Eske salaıyq, qańtar aıynyń basynja Almatyda 31-shi qalalyq kitaphana ashyldy.