Úıi órtenip ketken qostanaılyq otbasy halyqtan kómek surady
QOSTANAI. QazAqparat - Úıiniń túgi qalmaı janyp ketken Qostanaı turǵyny turǵyndardan kómek suraıdy, dep habarlaıdy QazAqparat.
Buǵan deıin habarlaǵanymyzdaı, 27 aqpan kúni saǵat 17:00 shamasynda Qostanaı-2 shaǵyn aýdanynda eki turǵyn úı órtendi.
Órt 350 sharshy metr aýmaqty sharpyǵan.
«Bári aıaq astynan boldy. Qazirdiń ózinde ne isterimdi bilmeı turmyn. Úıimizdiń saý-tamtyǵy joq. Ústimizdegi kıimmen ǵana dalada qaldyq. Balalar tanystarymyzdyń úıinde. Halyqtan kómek suraýǵa májbúr bolyp otyrmyn», - deıdi úıi órtengen Myrzaǵalı Ótegenov.
Qazirgi ýaqytta shyǵyn kólemi eseptelýde. Órt 27 aqpanda saǵat 19:03-te tolyǵymen sóndirildi.
«Aldyn ala boljam boıynsha órt elektr symdarynyń qysqa tuıyqtalýynan shyqqan. Oqys jaıttyń naqty sebepterin anyqtap jatyrmyz», - dedi oblystyq TJD bastyǵynyń orynbasary Azamat Orynbaev.
