Úıi órtenip ketken 83 jastaǵy ájeıge kómek kórsetile bastady
ShYMKENT. QazAqparat - Shymkentte úıi órtenip ketken 83 jastaǵy qarııaǵa kómek kórsetile bastady. Qalaǵa qarasty Eńbekshi aýdandyq ákimdiginiń qyzmetkerleri baspanany kúl-qoqystan tazartyp shyqty, dep habarlaıdy «QazAqparat» HAA tilshisi.
Búgin ákimdiktiń nusqaýymen kelgen júk kóligine janyp ketken zattar men qoqystar tıelip, shyǵaryldy.
«Eńbekshi aýdanynyń ákimdigi tarapynan zeınetker Rahıma Haıdarbekovanyń úıine járdemdesý jumystary júrgizilýde. Qoqysty tazalap, syrtqa shyǵaryp jatyrmyz. Úıdi retke keltirýdemiz»,-deıdi aýdan ákimdigi apparatynyń bas mamany Pernebek Aıtjanov.
Sondaı-aq jergilikti kásipker, oblystyq máslıhat depýtaty Baharam Ábdikárimov te jalyn sharpyǵan shatyrdy jańartýǵa qajetti qurylys materıaldaryn alyp berdi. Dese de, ony qajetine jaratyp, qurylys jumystaryn júrgizýge qarııanyń qaýqary da, qarajaty da bolmaı tur. Sondyqtan jany jomart jandar tabylyp, sony jóndep berse dep otyr.
Eske salaıyq, on eki kún buryn qart ana janazaǵa ketkende onyń baspanasy órtenip ketken bolatyn . Jatyn bólmeniń elektr shamynan tutanǵan jalyn úıdiń ishin alyp ketken. Jalǵyzbasty zeınetker úıine tilsiz jaý kireberis esikti sharpyǵan kezde oralǵan. Onyń janaıqaıyna birinshi kórshileri jetip, órtti sóndirmek bolǵan. Alaıda odan nátıje shyqpaǵan. Balasy men qyzy qaıtys bolǵan áıeldiń hali múldem múshkil. Sebebi, azyn-aýlaq dúnıe-múlki túgel janyp ketken. Qazir qarııa kórshileriniń as-sýyn iship, keshke dalada túnep júr.
