Úıi órtengenin kórgen er adamnyń densaýlyǵy kúrt nasharlady
ALMATY. QazAqparat - Almaty oblysynda bolǵan iri órtten qatar turǵan 3 otbasy baspanasynan aıyrylyp, dalada qaldy, dep habarlaıdy QazAqparat tilshisi.
Órt jıhaz tsehynan bastalǵan.
Jibek joly 12 mekenjaıy boıynsha turatyn Natalıa Patronına jatar aldynda tyrs etken dybystardy estigen.
«Birnárse jarq ete qaldy. Dalaǵa atyp shyǵyp qarasam, jıhaz tsehynyń aldy tutas órtenip jatyr eken. Sodan esim shyǵyp úıge kirmedim. Kórshilerdi túgel oıatyp, órt sóndirýshilerdi shaqyrdyq», - dedi N.Patronına.
Áıel sasqanynan úıdiń de, óziniń qujattaryn alyp shyǵýdy oılamaǵan.
Ekinshi úıde turatyn Toqathýnovtardyń úıi de demde úıindige aınaldy.
Úıi órtenip jatqanyn kórgen erli-zaıyptylar densaýlyqtary kúrt nasharlap aýrýhanaǵa jetkizildi.
«Ortańǵy úıde turatyn Toqtahýnovtardyń úıi túgi qalmaı órtenip ketti. Otaǵasy úıdiń órtenip jatqanyn kórip densaýlyǵy nasharlap ketti. Áıeli ekeýin jedel járdem alyp ketti. Qatty shok aldy. Úlken uldary qant dıabetimen aýyrady. Meniń anam da qan qysymy kóterilip otyr», - dedi Natalıa Patronınanyń uly.
Olardyń aıtýynsha, atalǵan tseh 2015 jyldan beri jumys istep keledi.
Osy ýaqyt aralyǵynda quzyrly organdar atalǵan nysandy teksermegen deıdi kórshileri.
Aıta ketý kerek, tótenshe jaǵdaı búgin 22:10-da bolǵan.
«Almaty oblysy Tuzdybastaý aýylynda túngi 22:10-da jıhaz tsehy órtengen. Qasyndaǵy barak tıptes úı de otqa orandy. Qyzyl jalyn 380 sharshy metrdi sharpydy. Órtti óshirýge 14 órt sóndirýshi men 3 tehnıka jumyldyryldy», - dedi R.Imanqulov.
Oqys oqıǵa ornyna aýdan ákimi Raıhan Sadyqova, aýdandyq prokýror, aýdandyq elektr jelisi basqarmasynyń, gaz qyzmetteriniń basshylary, ІІB basshysy keldi. Órtten eshkim japa shekken joq.
