Úıi órtengen tuzdybastaýlyqtarǵa 1,5 mln teńge materıaldyq kómek beriledi
ALMATY. QazAqparat - Úıi órtengen Tuzdybastaý aýylynyń 4 otbasyna Talǵar aýdany ákimdigi 1,5 mln teńge kóleminde materıaldyq kómek bermek, dep habarlaıdy QazAqparat tilshisi.
Bul týraly Aýdan ákiminiń orynbasary Dármenııar Qydyrbek aıtty.
Onyń aıtýynsha, jergilikti bılik órtten japa shekkenderge barynsha qol ushyn sozyp jatyr.
«Bul otbasylar barlyq materıaldyq zattary órtenip japa shegip otyr ǵoı. 4 otbasyǵa aýdan ákimdigi kıim-keshek basqa da qajettilikterine dep 1,5 mln teńge beredi. Búgin otbasylarǵa azyq-túlik jetkizildi. Jataqhanadan oryn da uıymdastyrdyq. Biraq olar bas tartty», - dedi ol.
Sondaı-aq ákim orynbasary janyp ketken úılerdiń qujattaryn rásimdeýge kómektespek.
«Ákimshilik tarapynan úıdiń qujattaryn bárin jasaýǵa qaıta rásimdeýge kómektesemiz. Arhıvten shyǵaryp, ádilet organdaryna tirkeý degen sııaqty jumystarmen ákimdik ózi aınalysady», - dedi sheneýnik.
Aıta ketý kerek, tótenshe jaǵdaı keshe 22:10-da bolǵan. Almaty oblysy Tuzdybastaý aýylynda jıhaz tsehy órtengen. Qasyndaǵy barak tıptes úı de otqa orandy. Qyzyl jalyn 380 sharshy metrdi sharpydy.
Oqys oqıǵa ornyna aýdan ákimi Raıhan Sadyqova, aýdandyq prokýror, aýdandyq elektr jelisi basqarmasynyń, gaz qyzmetteriniń basshylary, ІІB basshysy keldi.
Órt kezinde úıi órtengenin kórgen er adamnyń densaýlyǵy kúrt nasharlap medıtsınalyq kómekke júgingen.
