Úıi órtengen otbasyǵa 3,5 mln teńge aqshalaı kómek kórsetildi
Sondaı aq "Qaıyrymdy jandar toby" olarǵa 15 bas qoı berdi, dep habarlaıdy QazAqparat tilshisi. Qomaqty qarajat əleýmettik jeli arqyly jınalǵan."VIChAT" jelisi arqyly otandastarymyz úısiz qalǵan januıanyń taǵdyryna beı-jəı qaramaı, birden kómek kórsetýdi sheshken. Aınalasy on kúnniń ishinde 3,5 mln teńge aqsha jınalypty.
"Qaıyrymdy jandar toby 2016 jyldyń mamyr aıynan bastap erikti jandardan quryldy. VIChAT jelisi arqyly túrli aýyr jaǵdaıǵa tap bolǵan adamdarǵa kómek kórsetý maqsatynda qurylǵanbyz. Bastapqyda 50 adam edik, qazir sanymyz 350-ge jýyqtady",-deıdi "Qaıyrymdy jandar" eriktiler tobynyń múshesi Asyljan Momyshuly.
Bul atalǵan toptyń jasap otyrǵan kómeginiń alǵashqysy emes. Olar buǵan deıin de talaı mərte kómekke zərý jandarǵa qolushyn sozyp, demeýshilik jasaǵan. Byltyrdan beri 13 otbasyǵa kómektesip, 8 adamnyń emine aqsha jınap bergen. Qazir taǵy 4 adamǵa kómek kórsetý úshin qarjy jınap jatyr. Al atalǵan toptyń músheleri Qytaıdan kelgen qandastar.
Aıta ketý kerek, Súıinbek Jumabaıdyń úıin qańtardyń 11-nen 12-ne qaraǵan túni qyzyl jalyn jalmady. Al januıa músheleri sol kúni eki balasyn ertip, qonaqqa ketken.