Úıi órtengen aqtóbelikterge qurylys kompanııalary kómektesip jatyr
AQTÓBE. QazAqparat - Aqtóbede jańa jyl túni baspanasy órtengen jáne gaz ballony jarylyp, shatyry ortasyna túsken otbasyǵa kómek kórsetildi. Qurylys kompanııalary barlyq qajettilikti jetkizdi, dep habarlaıdy QazAqparat tilshisi.
Aqtóbe qalasynyń 150 jyldyǵyna oraı «150 ıgi is» qaıyrymdylyq aktsııasy júrip jatyr. Shara aıasynda órt shyǵyp, gaz ballony jarylǵan eki otbasyǵa kómek berildi.
«Zardap shekkenderdiń úıine barǵan oblystyq qurylys basqarmasynyń mamandary shyǵyndy qarap shyǵyp, qajetti qurylys materıaldaryn eseptedi, tizimin jasady. «Erzat» ÓK, «Babák-Qurylys» JShS, «Rail Track Aktobe» JShS, «Fagot ı K», «Kvarts-Spetsservıs», «Bı-M-72» qurylys kompanııalarynyń qoldaýymen olarǵa proflıst, aǵash, kirpish, shoıyn radıatorlary, penoplast jetkizildi. Zardap shekken eki otbasyǵa 1 mln teńgeniń qurylys materıaly tasymaldandy», - dep habarlady óńirlik kommýnıkatsııalar qyzmeti.
Buǵan deıin habarlaǵanymyzdaı, 31jeltoqsannan 1-qańtarǵa qaraǵan túni saıajaı aýmaǵyndaǵy úıden órt shyqty. Jetigenovtar otbasynyń nesıege alǵan úıi janyp ketip, otbasy dalada qaldy. Keıin Omarovtardyń úıinde gaz ballony jarylyp, bir adam aýrýhanaǵa tústi.
«Aqtóbe ákimdigi kelip, kómek berdi. Qazir qurylys kompanııalary úı salýǵa qajetti materıaldardy jetkizdi. Aldaǵy ýaqytta úıdiń irgetasyn qaıta quıyp, jańa úı salǵym keledi. Qurylysqa ruqsat berse iske kirisemin», - dedi úı ıesi Salamat Jetigenov.
