Úıi de, jumys orny da bir jerde - SQO-da «qol jetimdi polıtsııa» pýnkti ashyldy
PETROPAVL. QazAqparat – Soltústik Qazaqstan oblysyndaǵy Jambyl aýylynda ınspektordyń turǵyn úıimen biriktirilgen ýchaskelik polıtsııa pýnkti ashyldy, dep habarlaıdy QazAqparat tilshisi.
Jalpy aýdany 60 sharshy metr bolatyn ǵımarat eki aımaqqa bólingen. Keńse de, turǵyn úı de barlyq normalarǵa sáıkes jasalǵan. Jańa nysanda polıtsııa aǵa leıtenanty Meıirbek Qurmanov ári turady, ári turǵyndarǵa qyzmet kórsetedi. Osylaısha, ınspektor óz qyzmetin táýlik boıy atqarýy tıis.
Bul – oblysta turǵyn úımen biriktirilip ashylǵan osymen jetinshi ýchaskelik pýnkt. Keıingi eki jyl ishinde jergilikti atqarýshy organdar jáne aýyl sharýashylyǵy jetekshileriniń qoldaýymen osyndaı úıler Mamlıýt, Ýálıhanov, Shal aqyn aýdandarynda, Ǵabıt Músirepov atyndaǵy aýdanda jáne oblys ortalyǵynda ashyldy.
Aıta ketsek, Jambyl aýyly Petropavldan 200, al aýdan ortalyǵy Presnovka eldi mekeninen 60 shaqyrym qashyqtyqta ornalasqan. Aýyldyq okrýg quramyna Jambyl, Esperli, Qaraǵash, Sýatkól, Amangeldi aýyldary kiredi. Halyq sany – 500 adamnan astam. Krımınogendik ahýal turaqty.
«Qol jetimdi polıtsııa» qaǵıdaty boıynsha boı kótergen polıtsııa pýnktiniń ashylý rásimine qatysqan SQO PD bastyǵy Aıdyn Qabduldınov Presnovka aýylynda Jambyl aýdanynyń turǵyndary aldynda esep berý kezdesýin ótkizdi. Polıtsııa polkovnıgi ınternettegi alaıaqtyq, nashaqorlyq, mal urlyǵy faktileriniń, sondaı-aq jol-kólik oqıǵalarynyń aldyn alýdy kúsheıtý qajettiligine nazar aýdardy. Aýdannyń tórt turǵyny belsendi ustanymy men ishki ister organdaryna járdemdeskeni úshin polıtsııa departamentiniń alǵys hattarymen marapattaldy.
