Uıǵyr ıslamshylary Beıjińniń Tıananmen alańyndaǵy lańkestik áreket jaýapkershiligin óz moıyndaryna aldy
ASTANA. 24 qarasha. QazAqparat - Beıjińniń Tıananmen alańyndaǵy lańkestik áreket jaýapkershiligin «Túrkistannyń ıslam partııasy» óz moıyndaryna aldy. Islamshyldardyń saıtynda adamdardyń ólimine ákep soqqan apat sodyrlardyń Qytaı bıligine shabýylynyń bastamasy retinde atalǵan. Bul jaıynda RBK habarlady.
«Túrkistannyń ıslam partııasy» ózderiniń kóshbasshysy Abdýlla Mansýrdyń aýdıo jazbasyn saıttaryna ornalastyrǵan. Onda joǵaryda atalǵan aqparat uıǵyr tilinde baıandalady.
Esterińizge sala keteıik, aǵymdaǵy jyldyń 28 qazanynda Beıjińniń ortalyǵyndaǵy Tıananmen alańynda jol talǵamaıtyn kólik qorshaýdy buzyp ótip, týrıster tobyn qaqqan edi. Oqıǵa saldarynan kóliktegi úsh adam men eki jaıaý júrginshi mert boldy. Sonymen qatar 40-qa jýyq adam jaraqat aldy. Qytaı bıligi bul oqıǵany lańkestik áreket dep baǵalatyn bolatyn.
