Úıge tútin jáne ýly gaz datchıgin ornatý mindettele me – TJM jaýap berdi

NUR-SULTAN. QazAqparat – Órt qaýipsizdigin qamtamasyz etýdiń bir joly ǵımaratqa tútin jáne ýly gazdan habar beretin datchık ornatý. Búginde jylý berý maýsymy qarsańynda TJM mamandary jeke turǵyn úı sektorlaryn aralap órt qaýipsizdigi erejesin túsindirýmen qatar datchık ornatýdy usynyp jatyr. Osy oraıda turǵyndardy tútin men ýly gazdan qorǵaý maqsatynda datchık ornatý mindettele me?

Bul suraqqa QR TJM órtke qarsy qyzmet komıteti basqarmasynyń basshysy Erlan Tóregeldıev jaýap berdi, dep habarlaıdy QazAqparat tilshisi.

«Biz turǵyn úılerdi aralaý kezinde datchık ortanýdy usynys túrinde jetkizemiz. Odan ári turǵynnyń óz erkinde. Degenmen bizdiń mamandar órt pen gazǵa ýlanýdyń aldyn alýǵa datchıktiń úlken ról atqaratynyn aıtyp ótedi. Mysaly, ótken jylý berý maýsymy kezinde turǵyn úılerge ornatylǵan 36 datchık ýaqytyly dabyl qaǵyp, 100-ge jýyq adam ajaldan aman qaldy. Árıne, qýantarlyq jaǵdaı. Bıyl da bizdiń qyzmetkerler jeke turǵyn úı sektorlaryn aralap órt qaýipsizdigi men ot jaǵý kezinde saqtalýy tıis talaptar túsindiriledi. Sonymen qatar jergilikti atqarýshy organdarmen birlesip osal topqa jatatyn otbasylardyń úılerine tegin túrde datchık ornatatyn bolamyz», - dedi E. Tóregeldıev OKQ-de ótken baspasóz máslıhatynda.

Sondaı-aq, TJM ókiliniń aıtýynsha, bıylǵy jylý berý maýsymy qarsańynda órt qaýipsizdigi aktsııasyn uıymdastyrý eki kezeńnen turady.

Alǵashqy aktsııa 15 tamyz ben 15 qyrkúıek aralyǵynda ótti. Onyń aıasynda TJM qyzmetkerleri elimiz boıynsha 66 000-nan astam turǵyn úıdi aralap, órt qaýipsizdigi boıynsha nusqaýlyq berildi.

Atalǵan sharanyń ekinshi kezeńi 15 qyrkúıek – 15 qazan aıy aralyǵynda ótedi.