Úıge qaıtýǵa qoryqqan: Almatyda joǵalyp ketken 12 jasar qyz kóshede túnep shyqty
ALMATY. QazAqparat - Joǵalyp ketken 12 jasar qyz úıine oralýǵa qorqyp, kóshede túnegen, dep habarlaıdy QazAqparat tilshisi.
Keshki saǵat segiz shamasynda polıtsııaǵa kámeletke tolmaǵan qyzdyń joǵalyp ketkeni týraly habarlama kelip túsken. Balanyń ata-anasynyń aıtýynsha, saǵat tórtterde ol dúkenge baryp, sodan úıge qaıtyp oralmaǵan.
«Qyzdy izdestirýge krımınaldyq, ıývenaldy jáne patrýldik polıtsııa qyzmetkerlerinen, ýchaskelik ınspektorlardan jedel izdestirý toby quryldy. Joǵalǵan qyz oqyp jatqan mekteptiń muǵalimderi de qoldan kelgen kómegin kórsetti. Ony izdeýge barlyǵy 50-ge jýyq adam tartyldy. Oqý ornynda qyzdyń tártibi jaqsy ekenin, jaǵymsyz ádetteri bolmaǵanyn bile otyryp, biz onyń joǵalýynyń barlyq nusqalaryn qarastyrdyq. Qyzdyń áleýmettik ortasy, aýdan turǵyndary muqııat surastyryldy, beınebaqylaý kameralarynyń jazbalary qaraldy. Jeke menshik sektorda úıden alys emes jerde qaraýsyz qalǵan, aıaqtalmaǵan ǵımarattar, bıik shópter bar ekenin jáne tún bolǵanyn eskerip, oıymyzǵa jaman oılar kele bastady. Árqaısysymyz balanyń ómiri men densaýlyǵyna qaýip tónip turǵanyn túsindik, onyń qaýipsiz jáne saý kúıinde tabylýy - ár qyzmetker úshin úlken mindet. Aýa raıynyń qolaısyzdyǵyna jáne túngi ýaqytqa qaramastan, izdestirý toby ár ıesiz ǵımarat pen qańyrap bos qalǵan jerlerdi izdestirdi», – deıdi Áýezov aýdandyq polıtsııa basqarmasynyń bastyǵy Álisher Tursynbetov.
Іzdestirý sharalarynyń nátıjesinde tańǵa deıin qyz aman-esen tabyldy. Keıinirek kámeletke tolmaǵan bala dúkenge bara jatqanda dostaryn kezdestirip qalyp, oınap ketkenin moıyndady. Sosyn úıge oralýǵa qoryqqan.
