Úıge deıin kirgen: Mańǵystaý oblysynda qara qońyz qaptap ketti
AQTAÝ. KAZINFORM – Jándikter aýdan ortalyǵy Beıneýde jáne Aqjigit, Boranqul, Sarǵa aýyldarynda kóp.
Beıneý aýylynyń turǵyny Baqyt Tileýmuratova 4-5 kúnnen beri túnde uıyqtamaǵanyn aıtady. Sebebi qońyzdar úıge deıin kirip ketken. Jándikterdi óltiremin dep júrgende tań atady eken.
- Kesh bolsa boldy, úıdiń mańaıy qara qońyzǵa tolyp ketedi. Odan ol órmelep úıge kiredi. Nemerelerimniń qulaǵyna kirip keter dep, olardy Aqtaýǵa jiberdim. Ózimiz de qulaǵymyzǵa maqta tyǵyp jatamyz. Óltirgen saıyn kóbeıip jatyr. Keshe jańbyr jaýyp edi, sodan keıin paıda boldy osy qońyzdar. Túnde uıqy joq, - deıdi Baqyt Tileýmuratova.
Qara qońyzdar kóshelerdi, saıabaqtardy túgel jaılaǵan. Aýyldarda sý jınalǵan qudyqtarǵa deıin túsip, sýdy lastaǵan. Turǵyndar jándiktermen qalaı kúreserin bilmeı otyr.
- Úıdiń tóbesi shytyrlap, túnimen jatqyzbaıdy. Ózi ushady, qanaty bar. Adamdy shaǵady. Qalaı qutylarymyzdy bilmeı otyrmyz. Kórshilerdiń bári sonymen arpalysyp jatyr. Ýlaıyn dep preparat izdep shyqtym, - deıdi Kenjeǵul Ábilsheev.
Al Beıneý aýdandyq fıtosanıtarııa bóliminiń basshysy Dastan Muhanovtyń aıtýynsha, qara qońyzdyń qaptaýy alǵash ret tirkelip tur.
- Bul - tabıǵı qubylys. Biz qońyzdardy zerthanaǵa jiberip jatyrmyz. Karantındik pa, karantındik emes pa, zerthana qorytyndysynan keıin jarııalaımyz. Biraq turǵyndarǵa jándikterdi ózdiginen ýlaýǵa keńes bermeımin. Dezınfektsııa mamandaryna júgingen durys, - deıdi bólim basshysy.
Buǵan deıin, Mańǵystaýda Kaspıı teńizinde ıtbalyqtardyń qyrylý sebebi belgili boldy.