Úıge baryp koronavırýstan emdeıtin mobıldi brıgadalar qalaı jumys isteıdi

NUR-SULTAN. QazAqparat - Áleýmettik medıtsınalyq saqtandyrý qory jyl sońyna deıin 1,4 mln patsıentttiń úıine baryp qyzmet kórsetý úshin emhanadaǵy mobıldi brıgadalarǵa 7,7 mlrd teńge qarastyrdy, dep habarlaıdy QazAqparat.

Elimizde Covid-19, pnevmonııaǵa shaldyqqan, jiti respıratorlyq aýrýdyń belgileri bar patsıentterge úıde ambýlatorııalyq-emhanalyq kómek kórsetý úshin 3 myńǵa jýyq mobıldi brıgada quryldy.

Mobıldi brıgadalar emhana men otbasylyq ambýlatorııa janynan ýaqytsha, tirkelgen adam sanyna qaraı 5 myń halyqqa 1 mobıldi brıgada degen eseppen qurylady.

Mobıldi brıgadalardyń jumysyn óńirlerdiń densaýlyq saqtaý basqarmasy jergilikti jerlerde uıymdastyrady. Áleýmettik medıtsınalyq saqtandyrý qory qarjylandyrady. Halyqqa mobıldi brıgadalardyń qyzmeti tegin kórsetiledi.

Joǵary temperatýra, JRVI belgileri bar, koronavırýsqa nemese pnevmonııaǵa kúdigi bar patsıent jumys kúnderi saǵat 8.00-den 18.00-ge deıin, al qalǵan ýaqytta (saǵat 18-den keıin, demalys, mereke kúnderi) 103 telefony boıynsha aýmaqtyq emhananyń tirkeý bólimine júgine alady.

Emhananyń tirkeý bóliminde chek-paraqqa qarap patsıenttiń jaǵdaıyn baǵalaıdy. Operator keıin emhanadaǵy fıltr kabınetine ótýge keńes berýi múmkin nemese mobıldi brıgada uıymdastyrady.

Mobıldi brıgadanyń quramyna dáriger jáne/nemese medbıke, qajet bolǵan jaǵdaıda beıindi maman kiredi.

Mobıldi brıgadalar halyqqa mynadaı qyzmetter kórsetedi:

1) patsıentti alǵashqy tekserý, aýyrlyq dárejesin baǵalaý;

2) COVID-19 kúdikti patsıentterdi jedel jáne PTR-testileý;

3) kórsetkishter boıynsha rentgenografııaǵa nemese kompıýterlik tomografııaǵa joldama beredi;

4) qandaǵy otteginiń satýratsııasy 93% tómendegen kezde naýqastyń tóseginde konsýltatsııalyq top múshesimen aýdıo-vıdeokonferentsııa uıymdastyra otyryp, pýlsoksımetrııa júrgizý;

5) «COVID-19 Koronavırýstyq ınfektsııa» dıagnostıkasy men emdeýdiń klınıkalyq hattamasyna sáıkes dárilik zattardy taǵaıyndaý;

6) úıde emdeý nemese statsıonarǵa jatqyzý týraly máseleni sheshý (bul jaǵdaıda mobıldi brıgada jedel járdem brıgadasyn shaqyrady).

Jaǵdaıynyń aýyrlyǵyna qaraı patsıentke mynadaı medıtsınalyq kómek kórsetiledi:

- ambýlatorlyq dıstantsııalyq baqylaý: kúndelikti qońyraý shalý (monıtorıngtik top);

- BMSK dárigeriniń qashyqtyqtan keńes berýi;

- kórsetkishter bolǵan jaǵdaıda beıindi dárigerdiń qashyqtyqtan konsýltatsııasy;

- ambýlatorııalyq tegin dári-dármekpen qamtamasyz etý QR Densaýlyq saqtaý mınıstrliginiń buıryǵyna sáıkes: aýrýhanadan tys pnevmonııa kezindegi eresekter úshin, pnevmonııa, joǵarǵy tynys alý joldarynyń nemese tómengi tynys joldarynyń jiti respıratorlyq ınfektsııalary, sınýsıt/badamsha jáne adenoıd aýrýlary kezindegi balalar úshin

- klınıkalyq hattama boıynsha tegin dári-dármekpen qamtamasyz etýdi qosa alǵanda, aıǵaqtary bolǵan jaǵdaıda úıdegi statsıonar.

Medıtsınalyq saqtandyrý qory qyzmetterdiń sapasyn jaqsartý úshin patsıentter shaǵym jáne usynystarmen 1406 baılanys ortalyǵyna júginip, sondaı-aq Qoldau24/7 mobıldi qosymshasynda shaǵym qaldyra alady.