Úıge aqsha jınaımyz dep júrip 5 balasynan aıyrylǵandar bar - Depýtat Sharlapaevtyń daýly málimdemesin synady

Májilis depýtaty Elnur Beısenbaev Ónerkásip jáne qurylys mınıstri Qanat Sharlapaevtyń «deni saý adam jeńildetilgen ıpotekadan úmittenbegeni durys» degen málimdemesine jaýap berdi, dep habarlaıdy Kazinform. 

«Deni saý qazaqstandyqtar jumys istemeıdi dep kim aıtypty. Olar jumys istep júr. Mınıstrdiń sózine ne pikir aıta alam?! Otyrysta onymen qalaı sóıleskenimizdi kórdińizder ǵoı. Múmkin mınıstr jaqsy aqsha tabatyn shyǵar. Iá, onyń aılyǵy joǵary. Ol bul otbasylardy bilmeıdi ǵoı. Men oǵan sondaı otbasylarmen kezdesý uıymdastyramyn. Óz kózimen kórsin», - dedi Elnur Beısenbaev Májlistiń jalpy otyrysynda BAQ ókilderine bergen suhbatynda.

Depýtat baspanaǵa aqsha jınaımyz dep júrip 5 balasynan aıyrylǵan Sıterler otbasynyń qaıǵyly jaǵdaıyn eske saldy.

«Men ony (Ónerkásip jáne qurylys mınıstri Sharlapaevty -red.) tanymaımyn. Ómirbaıanyn bilmeımin. Men óz basym Sıterler otbasynyń qaıǵyly oqıǵasy kezinde Astana ákimdiginde jumys istegen edim. Sol jaǵdaıdan keıin kúnine 700-800 kópbalaly ana keletin. Osy baǵyt boıynsha jumys istegen alty aıdyń ishinde 1,5 myń otbasyny aralap shyqtym. Olardyń eshbiri shalqyp ómir súrip jatqan joq. Bári qolyndaǵy sońǵy tıynyn páter aqysyna berip otyr. Bir ǵana bólmeni 40 myń teńgege jaldap, tutas otbasymen turyp jatty. Konstıtýtsııada áleýmettik-ekonomıkalyq memleket ekenimizdi jazǵan ekenbiz, soǵan saı bolýymyz kerek. Jalpy ishki ónimimizdiń kólemi 450 mlrd dollar bolatyn kez keledi. Adamdardyń aılyǵy shynaıy jaǵdaıda 500 myń teńge bolatyn zaman týady. Bıýdjet qyzmetkerleri 1 mln teńgeden joǵary aılyq alatyn bolǵan kezde osy máseleni kóterýge bolatyn shyǵar», - dedi ol.

Aıta keteıik, mınıstr Qanat Sharlapaev Májilistiń búgingi jalpy otyrysy kezinde «Otbasy banktiń» baǵdarlamalaryna balama ıpoteka shyǵarý týraly usynysqa daýly málimdememen jaýap bergen bolatyn.