Úıdiń edeni tómen túsip, irgesi ajyraǵan: Túrkistanda tańdaýly turǵyn úı kesheni synǵa qaldy
TÚRKІSTAN. KAZINFORM — Áleýmettik jelide Túrkistan qalasyndaǵy Qoja Ahmet ıAsaýı kesenesine jaqyn ornalasqan kópqabatty úıdiń sapasyz salynǵanyn aıtqan turǵynnyń vıdeosy tarady.
Onda jańadan satyp alǵan úıi kúnnen-kúnge tómen qaraı túsip, irgeleri ajyrap, balkonynyń esigi jabylmaıtynyn jetkizgen turǵyn bul mańaıdan baspana satyp almaýǵa shaqyrǵan.
Osyǵan qatysty Túrkistan oblysy memlekettik sáýlet-qurylys baqylaý basqarmasy resmı jaýap berdi.
Vedomstvonyń málimetinshe, Túrkistan qalasyndaǵy B. Batyrbekov kóshesi, «Kerýen-Saraı» turǵyn úı kesheni, 20-úı mekenjaıynda ornalasqan 2 qabatty turǵyn úıge tekserý jumystary júrgizilgen.
— Tekserý barysynda 1-qabattaǵy № 19 páterdiń jýyný bólmesi, kireberis dálizi, ashana edeni jáne balkony, jalpy aýdany 20,2 m² bolatyn eden jabyndysynyń shógý faktisi anyqtaldy. Atalǵan nysan 2022 jylǵy 17 qazanda tapsyrys berýshi «Sýltanat ıAssy» JShS tarapynan paıdalanýǵa qabyldaý aktisimen qabyldanǵan. Merdiger kompanııa barlyq páterdi ishki árleý jumystarynsyz tapsyrady, al páter ıeleri ishki árleý jáne qondyrǵylardy ornatý jumystaryn óz betinshe júzege asyrady. Osyǵan baılanysty, «Sýltanat ıAssy» JShS-ne akkredıttelgen uıymdar arqyly atalǵan páterdegi eden jabyndysynyń shógý sebepterin anyqtaý maqsatynda tehnıkalyq qorytyndy alý jóninde nusqama berildi, — delingen vedomstvo usynǵan aqparatta.
Budan buryn Túrkistanda qoǵamdyq oryndardy lastaǵandarǵa 210 mln teńgege jýyq aıyppul salynǵanyn jazǵan edik.