Úıdiń kirpishi tsementsiz qalanyp jatyr – ákimdik vıdeoǵa túsinik berdi

QARAǴANDY. QazAqparat – Qaraǵandy oblysy Jańaarqa aýdanynyń ákimdigi kirpishi tsementsiz qalanyp jatqan kópqabatty úıge qatysty túsinik berdi, dep habarlaıdy QazAqparat tilshisi.

Jańaarqa aýdanynyń turǵyny jańadan salynyp jatqan kópqabatty úılerdiń qurylys alańyna baryp, vıdeo túsirgen. Ol qabyrǵasy turǵyzylǵan nysannyń ústine shyǵyp, kirpishter esh bekitilmesten, tsementsiz qalanyp jatqanyn kórsetedi. Qazir vıdeo áleýmettik jelide taralyp jatyr.

Aýdan basshylyǵy bul jaıtqa qatysty túsinik berdi.

«Áleýmettik jelilerde jarııalanǵan kópqabatty turǵyn úıdiń qurylysyn tekserý boıynsha aýdan ákimdiginiń janynan arnaıy komıssııa quryldy. Búgin, saǵat 10:00-de aýdan ákiminiń orynbasary Aıqyn Eleýsizov, qurylys bóliminiń basshysy Toqsan Babasov, aýdan prokýrorynyń kómekshisi Maqsat Baltashev, qoǵamdyq keńes múshesi Rabanı Nurkeev, «Amanat» partııasynyń hatshysy, aýdandyq depýtat Ómirzaq Ýalıev, sondaı-aq aýdan turǵyny Almas Qaıranbekov baryp tekserdi. Nysannyń basynda bas merdiger, tehnıkalyq qadaǵalaý mamandary bolmaǵandyqtan, atalmysh mamandar shaqyrylyp, qosymsha kezdesý josparlandy.

Qurylys basynda júrgen jaýapty qurylys jetekshisine ázirshe qurylysty toqtatý týraly tapsyrma berildi», - dedi Jańaarqa aýdany ákimdiginiń baspasóz qyzmetinen.