Úıden shyqpaı-aq kómek alýǵa bolady: SQO-da erekshe balalarǵa jańa joba bastalady
ASTANA. KAZINFORM — Soltústik Qazaqstanda múgedektigi bar balalardy súıemeldeýdiń jańa tásili engiziledi, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Mınıstrlik Soltústik Qazaqstan oblysynyń ákimdigimen birlesip, úı jaǵdaıynda arnaýly áleýmettik qyzmet alyp júrgen múgedektigi bar balalardy súıemeldeýdiń jańa jobasyn iske qosady.
— Endi balalarǵa úıde kórsetiletin úırenshikti áleýmettik qyzmettermen qatar, beıindi mamandardyń qashyqtan kómegi de usynylady. Bul tásil balalar men olardyń otbasylaryna qajetti kómekti qoljetimdi etýge múmkindik beredi. Ásirese aýdan ortalyǵynan nemese oblys ortalyǵynan shalǵaı eldi mekenderde turatyn otbasylar úshin mundaı qoldaý mańyzdy bolmaq. Jobanyń alǵashqy kezeńinde múgedektigi bar 180 balaǵa deıin qamtý josparlanyp otyr. Qatysý erikti túrde júzege asyrylady. Ol úshin balanyń zańdy ókiliniń jazbasha kelisimi qajet. Barlyq balaǵa birdeı tásil qoldanylmaıdy. Ár balanyń jaǵdaıy jeke baǵalanyp, qajetti kómektiń túri men kólemi soǵan qaraı belgilenedi, — delingen habarlamada.
Áleýmettik qyzmetker aldymen balaǵa qandaı kómek qajet ekenin anyqtaıdy. Odan keıin beıindi mamandarmen birge otbasyǵa kórsetiletin kómektiń túri men tártibin belgileıdi. Qaı mamannyń qashan keńes beretini, balaǵa qandaı tapsyrmalar beriletini jáne qandaı usynystar jasalatyny da osy josparǵa engiziledi. Balanyń jaǵdaıyna qaraı súıemeldeýge logoped, psıholog, dene medıtsınasy jáne ońaltý dárigeri, ońaltý mamany, áleýmettik ońaltý mamany jáne basqa da qajetti beıindi mamandar tartylady. Osylaısha ár balanyń naqty qajettiligine qaraı birneshe mamannyń kómegin qamtıtyn keshendi qoldaý kórsetiledi.
Mundaı tásil ásirese shalǵaı eldi mekenderde turatyn otbasylar úshin tıimdi bolýy múmkin. Qazir beıindi mamannan keńes alý úshin otbasyǵa aýdan nemese oblys ortalyǵyna barýǵa týra keledi. Al qashyqtan keńes berý arqyly qajetti usynystardy úıden shyqpaı-aq alýǵa múmkindik bar.
Jańa tásil osyndaı saparlardyń qajettiligin azaıtýǵa baǵyttalǵan. «FSM Social» tsıfrlyq platformasy arqyly mamandar otbasylarǵa qashyqtan keńes bere alady, jeke tapsyrmalar men usynystar jiberedi, otbasynyń keri baılanysyn alady jáne balany súıemeldeý nátıjelerin baqylap otyrady.
Bul rette mańyzdy jaıtty atap ótken jón. Jańa tsıfrlyq tásil úıde kórsetiletin arnaýly áleýmettik qyzmetterdi almastyrmaıdy, ıaǵnı balaǵa kórsetiletin qyzmetterdiń kólemi azaımaıdy.
— Kerisinshe, qashyqtan keńes berý qosymsha kómek retinde engiziledi. Bul otbasylarǵa qajetti mamandardan turaqty túrde keńes alyp, balanyń jaǵdaıyna qaraı tıisti qoldaý alýǵa múmkindik beredi. Qatysýshylardy daıyndaý jáne ár balaǵa jeke súıemeldeý baǵytyn ázirleý 2026 jyldyń qyrkúıeginde bastalady. Jobanyń negizgi kezeńi 2026 jyldyń qazan aıynan keler jyldyń sáýirine deıin jalǵasady. Al onyń ádistemelik jumysyna Áleýmettik qorǵaý salasyn damytýdyń ulttyq ǵylymı ortalyǵy jaýap beredi. Ortalyq beıindi mamandardyń jobaǵa qatysýyn uıymdastyrady, áleýmettik qyzmetkerlerdi daıyndaıdy, kúrdeli jaǵdaılar boıynsha mamandardyń jumysyn úılestiredi ári kórsetiletin qyzmetterdiń sapasyn baǵalaıdy, — delingen mınıstrlik taratqan habarlamada.
«FSM Social» tsıfrlyq platformasynyń tehnıkalyq turǵydan durys jumys isteýine Eńbek resýrstaryn damytý ortalyǵy jaýap bermek.
Atalǵan joba aıaqtalǵan soń Eńbek mınıstrligi jańa tásildiń tıimdiligin baǵalaıdy. Atap aıtqanda, qashyqtan kómek kórsetý arqyly otbasylardyń qajetti mamandarǵa qoljetimdiligi, balalarǵa kórsetilgen qoldaýdyń nátıjesi jáne bul tásildiń qyzmet alýshylar men olardyń zańdy ókilderine qanshalyqty yńǵaıly bolǵany saralanady. Alynǵan tájirıbe Mınıstrlik tarapynan úıde kórsetiletin arnaýly áleýmettik qyzmetterdi odan ári damytý jáne tsıfrlyq sheshimderdi jetildirý kezinde eskeriletin bolady.
Osylaısha, Soltústik Qazaqstan oblysynda úıde kórsetiletin áleýmettik qyzmetter men mamandardyń qashyqtan kómegin ushtastyratyn jańa tásil engiziledi. Negizgi mindet — bala men onyń otbasyna turǵylyqty jerine qaramastan qajetti qoldaýdy alýǵa múmkindik berý.
Budan buryn Soltústik Qazaqstan oblysynda jyl basynan beri múgedektikti belgileý jáne qaıta kýálandyrý boıynsha 3,4 myńnan astam adam qyzmet alǵany habarlandy.
