«Úıden shyǵýdan qaldyq»: Pavlodar turǵyndary sary masanyń shabýylyna ushyrap jatyr
PAVLODAR. KAZINFORM — Sharbaqty aýdanynyń ormandy jerlerinde ornalasqan aýyldardyń halqy sary masanyń kóptigine shaǵymdanyp otyr. Aıtýlarynsha, qansorǵysh jándikterdiń kóptiginen adamdar dalaǵa shyǵýdan qalǵan.
Áleýmettik jelide Sharbaqty aýdany Shoshqaly aýylynda túsirilgen kadrlar paıda boldy. Onda sary masanyń úıir-úıirimen ushyp, adamdarǵa shabýyldaǵan sátteri túsirilgen.
— Masanyń kóptigi sondaı, budan bylaı shydaý múmkin emes. Úıden attap shyqsań boldy bir úıir masa birden bas salady. Kóshede olardyń kóptiginen toqtaýsyz yzyń estilip turady. Sharýashylyqpen aınalysý, baqshada jumys isteý, balalarmen serýendeý nemese jaı ǵana taza aýada turý múldem múmkin emes. Tipti, úı janyndaǵy ájethanaǵa barýdyń ózi naǵyz azapqa aınaldy, — dep shaǵyndanǵan aýyl adamdary.
Turǵyndar jergilikti bılik organdary men jaýapty qyzmetterden atalǵan máselege nazar aýdaryp, aýmaqty masaǵa qarsy ýlaý (óńdeý) sharalaryn júrgizýdi surap otyr.
Belgili bolǵandaı, sary masanyń shabýyly Shaldaı ormandarynda ornalasqan Bozalań, Sadyqaşy jáne Shaldaı aýyldarynda da baıqalǵan.
Pavlodar oblysynyń ákimdigi óńirlik bıýdjet esebinen qarjylandyrylatyn dezınsektsııalyq is-sharalar bul aýmaqtarǵa qarastyrylmaǵanyn habarlady.
— Oblystyq bıýdjet esebinen qarjylandyrylatyn barlyq dezınsektsııalyq is-shara Ertis ózeniniń jaǵalaýynda ornalasqan qala-aýdandar aýmaǵyna baǵyttalǵan (Pavlodar men Aqsý qalalary, Maı, Aqtoǵaı, Ertis, Jelezın, Aqqýly jáne Tereńkól aýdandary). Ertis ózenine shyqpaıtyn Ýspen, Sharbaqty, Baıanaýyl aýdandarynda jáne Ekibastuz qalasynyń aýyldyq aımaǵyndaǵy jaıylmadan tys jáne dalalyq aýmaqtardy óńdeý qarastyrylmaǵan. Bul aýmaqtarda tek jekelegen ýchaskelerde jáne balalar lagerleri ornalasqan oryndardyń aınalasynda tosqaýyldyq óńdeý jumystary júrgiziledi, — dep málimdedi ákimdikten.
Sharbaqty aýdany turǵyndarynyń ótinishi boıynsha oblystyq jer qoınaýyn paıdalaný basqarmasynyń, oblystyq ǵylymı toptyń jáne aýdan ákimdiginiń ókilderi Shoshqaly, Bozalań, Sadyqaşy jáne Shaldaı aýyldaryna barǵany da habarlandy.
Mamandar qanattanǵan shybyn-shirkeıdiń qalyptan tys jappaı kóbeıý deregin rastaǵan. Bul kúrdeli jaǵdaı sońǵy 2-3 kún boıy baıqalyp otyr. Jaıylma aýmaqtarynan tys jerlerde shybyn-shirkeıdiń jappaı shyǵýyna orman órtterin sóndirý kezinde sý alýǵa arnalǵan jasandy sý aıdyndary, sondaı-aq atalǵan aýyldardyń mańynda paıda bolǵan shaǵyn jergilikti sý qoımalary sebep bolýy múmkin.
— 10 maýsymnan bastap atalǵan aýyldarda qanattanǵan shybyn-shirkeı túrlerine qarsy dezınsektsııalyq tosqaýyldyq óńdeý jumystary qolǵa alyndy. Óńdeý jumystary rants búrikkishteri men ystyq tuman generatorynyń kómegimen júrgizilýde. Sonymen qatar shybyn-shirkeıdiń dernásildik túrlerine qarsy sý aıdyndaryn bıologııalyq «Baktıtsıd» preparatymen óńdeý jumystary da júrgizilip jatyr, — dep qosty ákimdikten.
Eske sala keteıik, bıyl Pavlodar óńirinde shybyn-shirkeıdi ýlaýǵa drondar jumyldyrylady.
