Úıdegi anasy men balasyn qarýdan atqan aqtóbelikter sottaldy
AQTÓBE. QazAqparat -Áıel men onyń balasyn qarýdan jaraqattaǵan eki aqtóbelik 5 jáne 6 jylǵa bas bostandyqtarynan aıyryldy, dep habarlaıdy QazAqparat tilshisi.
Aqtóbeniń Temir aýdany Shubarqudyq aýylynda bolǵan oqıǵa týraly buǵan deıin habarlaǵan bolatynbyz. 2018 jyldyń 30 qazany kúni tún jarymda 58 jastaǵy áıel men onyń 23 jastaǵy balasy oqý jaraqatymen aýrýhanaǵa jetkizilgen bolatyn. Olarǵa shuǵyl ota jasaldy.
28 jastaǵy sottalýshylar J.Erlan men K.Meırambek Qylmystyq kodekstiń «Densaýlyqqa qasaqana aýyr zııan keltirý» baby boıynsha aıyp taǵyldy.
Іs materıalyna súıensek, oq jaraqatymen aýrýhanaǵa túsken 23 jastaǵy N.Turmaǵambet 2018 jyldyń 1 qańtary kúni sottalýshy K.Meırambekke pyshaq jaraqatyn salǵan. Ol kezde N.Turmaǵambetke psıhıatrııalyq statsıonarda májbúrlep emdeý taǵaıyndalǵan. Ózine pyshaq jaraqatyn salyp, jazalanbady degen oımen K.Meırambek kek saqtap, ony ózi jazalaýdy uıǵarǵan. Oıyn iske asyrý úshin tegis uńǵyly, qos aýyzdy 16 kalıbrli «TOZ-63» markaly ańshy myltyǵyn satyp alǵan. 2018 jyldyń qazanynda sottalýshylar aldyn ala kelisip, jábirlenýshini izdeıdi. Úıinen tapqan soń, N.Turmaǵambet pen onyń anasyn aýyr jaralaıdy.
Qylmystyq iske qatysty Temir aýdandyq sotynyń úkimi shyqty.
«J.Erlan Qylmystyq kodeksiniń 106-babynyń 2-bóligi 1, 5 tarmaqtarymen, K.Meırambek Qylmystyq kodeksiniń 28-babynyń 4-bóligimen, 106-babynyń 2-bóligi 1, 5 tarmaqtarymen kináli dep tanylsyn. J.Erlanǵa 6 jyl merzimge bas bostandyǵynan aıyrý túrindegi jaza taǵaıyndalsyn. K.Meırambekke 5 jyl merzimge bas bostandyǵynan aıyrý túrindegi jaza taǵaıyndalsyn. Jazany qylmystyq-atqarý júıesiniń ortasha qaýipsiz mekemesinde ótesin», - dedi sýdıa Altyn Aqmoldına.
