«Úıde jalǵyz» fılminiń juldyzy Ketrın O’Hara dúnıeden ótti

ASTANA. KAZINFORM – Amerıkalyq-kanadalyq aktrısa Ketrın O’Hara 71 jasynda ómirden ótti. Bul aqparatty aktrısanyń agenti rastady, dep habarlaıdy BBC.

Ketrın O’Hara kópshilikke eń aldymen áıgili gollıvýdtyq «Úıde jalǵyz» fılmindegi Kevın esimdi balanyń anasy róli arqyly tanymal. Kartınada onyń keıipkeri ulynyń úıde jalǵyz qalǵanyn ushaqta, demalysqa bet alǵan sátte ǵana ańǵaryp, keri oralýǵa tyrysady. Aktrısa bul róldi «Úıde jalǵyz 2» (1992) fılminde de somdaǵan.

2010 jyldardyń ortasynda O’Hara jańa býyn kórermenderiniń súıispenshiligine ıe boldy. Ol komedııalyq Shıtts Krık serıalynda basty rólderdiń birin oınap, mıllıondaǵan jankúıer jınady. Serıalda baılyǵynan aıyrylyp, shaǵyn provıntsııalyq qalaǵa kóshýge májbúr bolǵan mıllıarder otbasynyń taǵdyry baıandalady. Ketrın O’Hara onda ótken shaqta tanymal bolǵan aktrısany - basty keıipkerdiń jubaıyn somdady. Bul róldi oryndaǵan akter - ıÝdjın Levı.

Aktrısa kásibı mansabyn 1970 jyldardyń ortasynda Kanadada bastap, komedııalyq teleshoýlarǵa qatysqan. Ol tek akterlikpen shektelmeı, telebaǵdarlamalarǵa stsenarıı de jazǵan. Osy eńbegi úshin 1982 jyly alǵashqy «Emmı» syılyǵyn ıelendi.

Kıno salasyndaǵy alǵashqy eleýli tabysqa ol Tım Berton túsirgen «Bıtldjıýs» fılminen keıin jetti. Al «Úıde jalǵyz» komedııasy Ketrın O’Haranyń mansabyndaǵy eń tanymal ári kórermenge jaqyn jobalardyń birine aınaldy.

Ketrın O’Hara birneshe býyn kórermeni úshin otbasy, ıýmor jáne jyly emotsııalarmen baılanysty obrazdardy somdaǵan aktrısa retinde este qaldy.

Aıta keteıik, jaqynda Valentino sán úıiniń negizin qalaǵan Valentıno Garavanı ómirden ótkeni habarlandy.