Úıde otyrǵan áıelderdiń jumys isteýine múmkindik bar - sarapshy
NUR-SULTAN. QazAqparat - Qazaqstandyq áıelderdiń bızneske aralasý úrdisiniń aýqymy keńeıip keledi. Bul týraly QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Elena Tarasenko aıtty, dep habarlaıdy QazAqparat tilshisi.
«Áıelder búgin de jumys pen otbasylyq qam-qareketti qatar alyp júr. Bul úrdis búgingi kúnniń shynaıylyǵyna aınaldy. Bul áıelder úshin ǵana emes, memleket pen otbasynyń, qoǵamnyń qajettiligine aınalǵanyn atap ótý kerek. Qazaqstanda qazirgi ýaqytta 1,2 mln shaǵyn jáne orta bıznes sýbektisi bar desek, sol barlyq kásipkerliktiń 43,2 paıyzy áıelderge tıesili», - deıdi Elena Tarasenko Astanadaǵy «Qazaqstandaǵy áıelderdiń ekonomıkalyq quqyqtary men múmkindikterin keńeıtý: tájirıbe, syn-qaterler jáne perspektıvalar» atty konferentsııasynda.
Sonymen birge, ulttyq komıssııa tóraǵasynyń orynbasary eńbek naryǵyndaǵy ınnovatsııalar áıelderge tyń múmkindikterdi ashyp otyrǵanyn tilge tıek etti.
«Qazir tsıfrlyq zamannyń dáýiri keldi. Tsıfrlyq tehnologııalar bizdiń ómirimizge, oqý men jumysqa túbegeıli ózgeristerdi engizýde. Jańasha oılap, josparlap, sheshim qabyldaýǵa jol ashýda. Innovatsııalyq tehnologııalar damyǵan zamanda ekonomıkanyń salmaqty salalaryna áıelderdi tarta otyryp, keremet tabystarǵa qol jetkizýge bolady. Alaıda eńbek naryǵynda zor suranysqa ıe bolý úshin áıelderge mamandandyrylǵan bilim beretin sapaly jańa bilim kózderi kerek», - deıdi ol.
Elena Tarasenko osy atalǵan múmkindikterge baılanysty naqty mysaldar keltirdi.
«Qazirgi eńbek naryǵynyń sıpaty tym bólek. Jumystyń standarttan tys túrleri alǵa shyqty. Qashyqtyqtaǵy jumys, tutyný taýarlaryna qatysty ózin-ózi jumyspen qamtý, ol ónimderdi áleýmettik jeli arqyly saýdalaý... Bul ásirese úıde otyrǵan áıelderge óte yńǵaıly. Búldirshinmen úıinde otyrǵan ana óz jumysynyń kestesin ózi jasaýǵa quqyly. Osylashıa, áıelder qarjylyq táýelsizdikke qol jetkizip keledi», - deıdi spıker.
