Úıde oqıtyn balalar járdemaqysyz qaldy: Prokýratýra tekseris júrgizdi

ASTANA. KAZINFORM — Balqash qalasynyń prokýratýrasy múmkindigi shekteýli balalardyń úıde oqýǵa járdemaqy alý quqyǵyn qalpyna keltirdi. Bul týraly Qaraǵandy oblysynyń prokýratýrasynyń baspasóz qyzmeti habarlady. 

Balqash qalasynyń prokýratýrasy múmkindigi shekteýli balalardyń quqyqtaryn qorǵaý salasyndaǵy zańnamanyń oryndalýyna taldaý júrgizdi.

Konstıtýtsııanyń 28-babyna sáıkes árbir azamatqa múgedektigi boıynsha áleýmettik qamsyzdandyrýǵa kepildik beriledi. Áleýmettik kodekske sáıkes múgedektigi bar adamdardyń memlekettik áleýmettik járdemaqylar alýǵa, onyń ishinde úıde oqytýǵa jumsalatyn shyǵystarynyń ótelýine quqyǵy bar.

— Taldaý barysynda Balqash qalasynda úıde oqıtyn 38 múgedek balanyń 14-iniń ata-anasy tıisti járdemaqy almaıtyny anyqtaldy. Qalalyq máslıhattyń sheshimi boıynsha mundaı ótemaqynyń mólsheri oqý jylyna 10 aılyq eseptik kórsetkishti quraıdy (aıyna 13 106 teńge), tólemder toqsan saıyn júrgiziledi, — delingen habarlamada.

Ne sebep boldy

Zań buzýǵa bilim berý uıymdarynyń ata-analardy tıisti túrde habardar etpeýi sebep bolǵan.

— Taldaý qorytyndysy boıynsha prokýratýra Balqash qalasynyń Bilim bólimne usyný engizdi. Qabyldanǵan sharalardyń nátıjesinde balalarǵa tıisti tólemder taǵaıyndaldy. Prokýratýra kámeletke tolmaǵandardyń quqyqtary men zańdy múddelerin qamtamasyz etý boıynsha jumysty jalǵastyrady, — delingen habarlamada.

Aıta ketelik Saryaǵashta múgedektigi bar balany edende súıregen qyzmetkerge qatysty qylmystyq is qozǵalǵan edi.