Úıde krandy tamshylatyp, sýdy ysyrap etpeńiz: turǵyndar neni bilýi kerek
ASTANA. KAZINFORM - Sý – jer betindegi tirshiliktiń negizi jáne eń qundy tabıǵı resýrstardyń biri. Ǵalamsharymyz sý qoryna baı bolǵanymen, paıdalanýǵa jaramdy tuşy sý kólemi shekteýli. Sondyqtan sýdy utymdy paıdalaný qazirgi zamannyń mańyzdy ekologııalyq mindetteriniń biri.
Kóptegen adam turmystaǵy sýdyń azdaǵan ysyrabyna mán bere bermeıdi. Alaıda qarapaıym ǵana tamshylap turǵan krannyń ózi aıtarlyqtaı sý shyǵynyna ákelýi múmkin. Mamandardyń baǵalaýynsha, aqaýly kran arqyly táýligine ondaǵan lıtr sý bosqa aǵýy yqtımal. Bul birneshe adamnyń kúndelikti turmystyq qajettiligine jetetin kólem.
Eger mundaı sý shyǵyny uzaq ýaqyt boıy jalǵasatyn bolsa, aı saıyn myńdaǵan lıtr sý rásýa bolady. Al mundaı jaǵdaı kópqabatty turǵyn úılerde, eldi mekenderde nemese tutas óńir kóleminde bolsa, sý resýrstaryna túsetin júkteme edáýir artady.
Ekologııa jáne tabıǵı resýrstar mınıstrligi sýdy únemdeý tek tabıǵı resýrstardy saqtaý úshin ǵana mańyzdy emes ekenin atap ótti. Sýdy tutynýshylarǵa jetkizý úshin sý tazartý qurylystary, sorǵy stantsııalary jáne ınjenerlik jeliler úzdiksiz jumys isteıdi. Bul óz kezeginde elektr energııasyn qajet etedi jáne qorshaǵan ortaǵa qosymsha áser etedi. Sondyqtan sýdy uqypty paıdalaný tabıǵı resýrstardy saqtaýmen qatar, energııa tutynýdy azaıtýǵa da múmkindik beredi.
Árbir azamat sý resýrstaryn saqtaýǵa óz úlesin qosa alady. Ol úshin qarapaıym qaǵıdalardy ustaný jetkilikti:
• santehnıkalyq quraldardaǵy aqaýlardy ýaqytyly jóndeý;
• tis tazalaý nemese qol sabyndaý kezinde krandy jaýyp qoıý;
• turmystyq tehnıkany tolyq júktememen paıdalaný;
• úı jaǵdaıynda sý shyǵynyn baqylaý;
• balalarǵa tabıǵı resýrstardy uqypty paıdalaný mádenıetin úıretý.
Sýdy utymdy paıdalaný – bul tek únemdeý ǵana emes, sonymen qatar ekologııalyq jaýapkershiliktiń kórinisi. Sý resýrstaryn qorǵaý – bolashaq urpaq úshin qolaıly qorshaǵan ortany saqtaýǵa baǵyttalǵan mańyzdy qadam.
Aıta keteıik, Astanada oqýshylarǵa arnalǵan sý únemdeý zerthanasy tanystyryldy.
Sý únemdeý mádenıetin qalyptastyrýǵa arnalǵan jańa bilim berý resýrsy ázirlenip jatyr.
