Úıde kondıtsıonerdi qosyp uıyqtaýdyń zııany bar ma
ÓSKEMEN. KAZINFORM — Jazdyń aptap ystyǵynda kondıtsıonerdiń talaı adam úshin taptyrmas kómekshige aınalǵany belgili. Alaıda el arasynda onyń densaýlyqqa áseri týraly túrli pikir aıtylady. Biri kondıtsıoner mindetti túrde sýyq tııýge sebep bolady dese, endi biri ony túnde qosyp uıyqtaýdyń zııany shash etekten deıdi. Bul qanshalyqty ras? Kazinform tilshisi osy suraqtardyń jaýabyn bilip kórdi.
Búginde jaz mezgilinde kondıtsıonersiz ómir súrý múmkin emesteı kórinedi. Dese de keıbir jandar onyń áserinen mindetti túrde sýyq tıedi dep esepteıdi. Dárigerdiń aıtýynsha, bul keń taralǵan qate túsinik.
— Kondıtsıonerdiń ózi sýyq tııýge sebep bolmaıdy. Óıtkeni jiti respıratorlyq vırýstyq ınfektsııalar sýyq aýadan emes, vırýstardan paıda bolady. Degenmen kondıtsıonerdi durys paıdalanbaý aýrýdyń asqynýyna áser etýi múmkin. Eger salqyn aýa aǵyny adamǵa tikeleı baǵyttalsa, tynys joldarynyń shyryshty qabaty men bulshyqetteri salqyndaıdy. Sonyń saldarynan aǵzanyń qorǵanys qabileti tómendep, vırýstardyń enýine nemese aǵzada burynnan bolatyn shartty-patogendi mıkroorganızmderdiń belsenýine múmkindik týady, — deıdi jalpy-tájirıbelik dáriger Tańsholpan Talǵatbekova.
Maman taǵy bir mańyzdy máselege nazar aýdardy. Kondıtsıonerdiń súzgileri ýaqtyly tazalanbasa, onda shań, allergender men bakterııalar jınalady.
— Qurylǵy jumys istegen kezde bul bólshekter aýaǵa tarap, allergııalyq reaktsııalarǵa, tynys joldarynyń shyryshty qabatynyń titirkenýine nemese sozylmaly tynys alý aýrýlarynyń asqynýyna sebep bolýy múmkin. Osyǵan baılanysty bólme ishindegi temperatýrany 23-25 gradýs shamasynda ustap, syrtqy jáne ishki aýa temperatýrasynyń aıyrmashylyǵyn 5-7 gradýstan asyrmaı, salqyn aýa aǵynyn adamǵa tikeleı baǵyttamaı jáne kondıtsıonerdiń súzgilerin turaqty túrde tazalap otyrǵan jón, — deıdi medıtsına qyzmetkeri.
Kópshilikti tolǵandyratyn taǵy bir suraq — kondıtsıonerdi qosyp uıyqtaý densaýlyqqa zııan ba? Dárigerdiń aıtýynsha, qurylǵy durys jumys istep, qajetti rejımde qosylǵan bolsa, kondıtsıonermen uıyqtaý qaýipti emes. Kerisinshe, bólmedegi qolaıly temperatýra sapaly uıqyǵa jaǵdaı jasap, ystyq kúnderi júrek-qantamyr júıesine túsetin júktemeni azaıtady.
— Alaıda temperatýra tym tómen, mysaly 18-19 gradýsqa qoıylsa nemese salqyn aýa tósektiń ústine tikeleı baǵyttalsa, tańerteń adamnyń tamaǵy qurǵap, murny bitelýi nemese moıyn men arqa bulshyqetterinde aýyrsyný paıda bolýy múmkin. Mundaı belgiler kóp jaǵdaıda ınfektsııadan emes, sýyq aýa men shyryshty qabattardyń kebýinen týyndaıdy. Sondyqtan túngi ýaqytta bólme temperatýrasyn 24-26 gradýs shamasynda ustap, kondıtsıonerdiń aýa aǵynyn tósekke tikeleı baǵyttamaǵan abzal. Eger bólme aýasy shamadan tys qurǵap ketse, aýany ylǵaldandyrǵysh qoldanǵan nemese bólmeni mezgil-mezgil jeldetip turǵan durys. Kondıtsıonerdiń ózi densaýlyqqa qaýip tóndirmeıdi. Kóp jaǵdaıda másele qurylǵynyń ózinde emes, ony durys paıdalanbaýda. Qarapaıym qaýipsizdik erejelerin saqtaý arqyly jazdyń aptap ystyǵynda da jaıly ári densaýlyqqa zııansyz salqyndyqty qamtamasyz etýge bolady, — deıdi Tańsholpan Talǵatbekova.
Eske salsaq, osyǵan deıin aptap ystyqta jıi sý iship, kókónisti kóbirek jegen durystyǵy týraly jazǵanbyz.
