Úıde hırýrgııalyq kómek kórsetý: jańa standart engizildi

ASTANA. QazAqparat – Densaýlyq saqtaý mınıstriniń buıryǵymen hırýrgııalyq (ish, keýde, koloproktologııalyq) kómek kórsetýdi uıymdastyrýdyń jańartylǵan standarty bekitildi, dep habarlaıdy QazAqparat vedomstvo saıtyna silteme jasap.

Buıryqpen bekitilgen hırýrgııalyq kómek kórsetýdi uıymdastyrý standarty Qazaqstan Respýblıkasynda hırýrgııalyq kómekti uıymdastyrýǵa qoıylatyn jalpy qaǵıdattar men talaptardy belgileıdi.

Hırýrgııalyq kómek kórsetýdi uıymdastyrý tártibi Halyq densaýlyǵy týraly Kodekske sáıkes medıtsınalyq kómektiń sharttaryna, nysandaryna sáıkes baıandalǵan. Úıde, shuǵyl jáne josparly túrde hırýrgııalyq kómek kórsetý bólimderi engizilgen.

Jańa standartta shtat sany, hırýrgııalyq kómek kórsetetin densaýlyq saqtaý uıymdaryn jaraqtandyrý kózdelgen.

Geografııalyq qoljetimdilikti, kadrlyq jáne materıaldyq-tehnıkalyq resýrstardy, halyqtyń medıtsınalyq kómekti tutyný kólemin, jedel aralasý qaýpiniń dárejesin eskere otyryp, statsıonarlyq jaǵdaılarda hırýrgııalyq kómek kórsetýdi óńirlendirý kózdelgen.

Qujatta sarǵaıý jáne ish qýysynyń suıyqtyq jınaqtarynyń drenajy kezinde jekelegen aýyr jaǵdaılarda mamandandyrylǵan hırýrgııalyq kómek ortalyqtaryn uıymdastyrý kózdelgen.