Muqtaj jandar eGov Mobile arqyly áleýmettik kómekke ótinish bere alady

ASTANA. KAZINFORM — eGov Mobile qosymshasynda muqtaj azamattardyń jekelegen sanattaryna áleýmettik kómek taǵaıyndaý qyzmeti qoljetimdi boldy, dep habarlaıdy QR Elektrondyq úkimetiniń baspasóz qyzmeti.

Ómirlik qıyn jaǵdaıǵa tap bolǵan azamattar endi áleýmettik kómek alý úshin eGov Mobile mobıldi qosymshasy arqyly ótinish bere alady. Buǵan deıin bul múmkindik tek eGov.kz portaly arqyly qoljetimdi bolatyn. Endi ótinishti tikeleı smartfonnan rásimdeýge bolady.

Áleýmettik kómek — bul ómirlik qıyn jaǵdaıǵa tap bolǵan azamattardyń jekelegen sanattaryna jergilikti atqarýshy organdar tarapynan kórsetiletin aqshalaı tólem nemese materıaldyq qoldaý. Qyzmettiń mobıldi formatqa kóshýi mundaı kómekti alý protsesin anaǵurlym jeńil ári yńǵaıly etedi. Ótinishti kez kelgen ýaqytta jáne kez kelgen jerden berýge bolady, al rásimdeý ýaqyty edáýir qysqarady.

Máslıhattardyń sheshimderi boıynsha áleýmettik kómek qosymsha qoldaýǵa muqtaj azamattarǵa, sonyń ishinde áleýmettik mańyzy bar aýrýlary bar adamdarǵa, óz-ózine qyzmet kórsete almaıtyn egde jastaǵy azamattarǵa, ata-anasynyń qamqorlyǵynsyz qalǵan tulǵalarǵa, sondaı-aq tabysy tómen otbasylarǵa kórsetiledi.

— Ótinish berý protsesi barynsha avtomattandyrylǵan. Ótinimdi toltyrý kezinde derekterdiń bir bóligi memlekettik aqparattyq júıelerden avtomatty túrde júkteledi. Bul rásimdeýdi jeńildetip, qatelik jiberý yqtımaldyǵyn azaıtady. Tájirıbe kórsetkendeı, tek 2025 jyldyń ózinde eGov.kz portaly arqyly 7 myńnan astam ótinish túsken, — dedi «Ulttyq aqparattyq tehnologııalar» AQ basqarma tóraǵasy Dáýlet Bekmanov.

Qyzmetti paıdalaný úshin paıdalanýshyǵa:

• eGov Mobile mobıldi qosymshasyna kirip, «eGov memlekettik qyzmetter» — «Arnaıy qyzmetter» bólimine ótý;
• «Jergilikti ókildi organdardyń sheshimderi boıynsha muqtaj azamattardyń jekelegen sanattaryna áleýmettik kómek taǵaıyndaý» qyzmetin tańdap, qajetti derekterdi toltyrý;
• qol qoıýdyń qoljetimdi tásilderiniń birimen ótinimdi rastaý;
• «Qyzmetter tarıhy» bóliminde ótinishtiń óńdelý mártebesi týraly habarlamamen tanysý qajet.

Qyzmet kórsetý nátıjesi retinde áleýmettik kómektiń taǵaıyndalǵany týraly habarlama nemese ótinishtiń qanaǵattandyrylmaǵany jóninde negizdelgen jaýap beriledi.

Ótinish berilgennen keıin ol ýákiletti organ tarapynan qaralady. Sheshim otbasynyń tabys deńgeıin jáne belgilengen ózge de ólshemderdi eskere otyryp qabyldanady. Ótinishti qaraý merzimi — 8 jumys kúnine deıin. Qyzmet tegin kórsetiledi.

Qyzmet Jasandy ıntellekt jáne tsıfrlyq damý mınıstrliginiń Memlekettik qyzmetter komıteti, «Ulttyq aqparattyq tehnologııalar» AQ jáne Eńbek jáne halyqty áleýmettik qorǵaý mınıstrligi tarapynan iske asyryldy.

Buǵan deıin eGov Mobile qosymshasynda múlikti erikti saqtandyrý servısi iske qosylǵanyn jazǵanbyz.