Úıde atys qarýyn saqtaýdyń talaptary qandaı

SEMEI. KAZINFORM — Polıtsııa qyzmetkerleri úıde atys qarýyn saqtaýdyń talaptary qandaı ekenin túsindirip berdi.

Abaı oblysynyń polıtseıleri turǵyndarǵa atys qarýyn zań talaptaryna sáıkes durys jáne qaýipsizdik saqtaýdyń mańyzyn eske saldy.

– Azamattyq qarý – jeke qorǵanys quraly ǵana emes, úlken jaýapkershilik. Ony saqtaýdyń talaptaryn bilý ózińiz ben aınalańyzdaǵy adamdardyń ómirin qorǵaýdyń kepili. Qarýdy saqtaý erejelerine sáıkes, azamattyq qarý arnaıy metall seıfte nemese qulyptalatyn temir jáshikte ǵana saqtalýy tıis. Qarý men oq-dárilerdi árdaıym bólek ornalastyrý qajet. Qarý bógde adamdardyń, ásirese kámeletke tolmaǵandardyń qoly jetpeıtin jerde saqtalýy kerek, – dep habarlady departamenttiń baspasóz qyzmetinen.

Sondaı-aq habarlamada qarýdy tirkeý, qaıta tirkeý jáne saqtaý merzimderin qatań saqtaý zańmen mindettelgeni aıtylǵan.

– Turǵyndarǵa qarýdy zańsyz paıdalanýǵa jol bermeýdi, qaýipsizdik sharalaryn jaýapkershilikpen saqtaýdy jáne zań talaptaryn buzǵan jaǵdaıda jaýapkershilik qarastyrylǵanyn eskertemiz. Qarý durys saqtalsa jáne zań talaptaryna sáıkes paıdalanylsa ǵana qaýipsizdik kepili bolady, — delingen aqparatta.

Eske salsaq, osyǵan deıin eldegi qyzmettik qarýdy saqtaý isinde kemshilikter anyqtalǵany habarlanǵan.