Úıdi talapqa saı etip sala almaǵan qurylysshylar tutynýshylarǵa 86,4 mln teńge qaıtardy
ASTANA. KAZINFORM - 2025 jyldyń alǵashqy bes aıynda Saýda jáne ıntegratsııa mınıstrligi Tutynýshylardyń quqyqtaryn qorǵaý komıteti turǵyn úı satyp alý kezinde tutynýshylardyń quqyqtarynyń buzylýyna baılanysty birqatar rezonanstyq isterdi qarady.
Saýda mınıstrligi 19 azamattyń qurylys salasyndaǵy quqyǵyn qorǵap, 86,4 mln teńgesin keri qaıtardy, dep habarlaıdy mınıstrliktiń baspasóz qyzmeti.
Almaty qalasynda tutynýshy páter satyp alǵannan keıin, qabyldaý kezinde sapasyna baılanysty eleýli kemshilikter anyqtalyp, tólengen qarajatty qaıtarýdy talap etken. Kemshilikter qataryna qurylys aqaýlary, jylý oqshaýlaý deńgeıiniń tómendigi, ruqsat etilgen shý deńgeıiniń asyp ketýi jáne taǵy basqa jaıttar kirdi. Departament tarapynan kórsetilgen quqyqtyq súıemeldeý nátıjesinde tutynýshyǵa 25,9 mln teńge qaıtaryldy.
Shymkent qalasynda eki bólmeli páter satyp alǵan tutynýshy kelisimshart talaptaryna sáıkes kelmeıtin turǵyn úı alǵan. Satýshy páterdi aýystyrý nemese tólengen somany qaıtarý týraly talapty qanaǵattandyrýdan bas tartqan. Aýmaqtyq departament tarapynan kórsetilgen quqyqtyq kómek pen túsindirý jumystarynyń nátıjesinde tutynýshyǵa 27 mln teńge qaıtaryldy.
Qaraǵandy oblysynda tutynýshy 45 kún ishinde páterdi tapsyrý týraly mindettememen satyp alý-satý shartyn jasasqan. Alaıda páterdi tapsyrý merzimi buzylyp, nysan qonystanýǵa daıyn bolmaǵan. Departament mamandary tutynýshyǵa sotqa deıingi shaǵym ázirleýge kómektesip, ári qaraıǵy áreketter boıynsha usynymdar berip, qurylys salýshyǵa túsindirý jumystaryn júrgizgen. Nátıjesinde tutynýshyǵa naryqtyq quny 33,5 mln teńge bolatyn páter berildi.
Túrkistan oblysynda departamentke bir kópqabatty turǵyn úıdiń 16 páter ıesinen ujymdyq ótinish kelip tústi. Turǵyndar ınjenerlik jelilerdi tóseý jumystarynyń sapasyz júrgizilgenine jáne kelisimshart talaptarynyń oryndalmaýyna shaǵymdanǵan. Departament tarapynan quqyqtyq kómek kórsetilip, keńester berildi, qoldanystaǵy zańnama normalary boıynsha túsindirý jumystary uıymdastyryldy. Daýlar medıatsııa tártibimen sheshilip, nátıjesinde merdiger uıym 2025 jylǵy 1 tamyzǵa deıin anyqtalǵan barlyq kemshilikterdi joıyp, jumystardy tıisti sapada aıaqtaýǵa mindettendi.
Jalpy, 2024–2025 jyldary qurylys salasyndaǵy osyndaı jaǵdaılar boıynsha 52 tutynýshynyń quqyǵy qorǵaldy. Qaıtarylǵan talaptardyń jalpy somasy 481,2 mln teńgeni qurady. Tutynýshylardyń quqyqtaryn qorǵaý komıteti azamattardyń zańdy quqyqtaryn qorǵaý jáne qurylys naryǵy sýbektileriniń jaýapkershiligin arttyrý baǵytynda barlyq qajetti sharalardy qabyldaýdy jalǵastyrady.
Osyǵan deıin Senat turǵyn úı salasyn retteıtin ilespe zańdy Májiliske qaıtarǵany týraly jazdyq.