Uıaty bar urylar
ASTANA. QazAqparat - Ystambulda múgedek áıeldiń páterine basyp kirgen qylmyskerler urlyq jasalǵannan keıin bir aıdan soń qoldy bolǵan múliktiń bir bóligin qaıtaryp berip, onyń aldynda keshirim surady, dep habarlady RIA «Novostı».
Bir aı buryn urylar Ystambuldyń Maltepe aýdanynda turatyn 50 jastaǵy memlekettik qyzmetker Emrı Seledbıdiń úıine túsip, onyń kompıýteri, kamerasy men vıdeomagnıtofonyn urlap áketken. Jergilikti BAQ habarlaǵandaı, ótken aptanyń sońynda áıel adam úıge kireberis esiktiń aldynan urlanǵan kompıýter, kamera men aty-jóni kórsetilmegen belgisiz hatty tapqan.
«Biz - urylarmyz, biraq bizdiń ar-uıatymyz bar. Biz shynymen de ókinemiz. Biz sizdiń múgedek ekenińizdi bilmedik. Ótinemiz, keshirińiz bizdi», - delingen hatta.
Buǵan tańǵalǵan áıel osy oqıǵany jýrnalısterge málimdedi.
«Olar ázirge vıdeomagnıtafondy qaıtarmady. Jaqynda olar ony qaıtaryp beredi dep úmittenemin», - dedi ol.
Bul urylardyń tarapynan bolǵan mundaı birinshi jaǵdaı emes. Ótken jyly tamyz aıynda brıtanııalyq basylymdarda júzýden eki dúrkin olımpıada chempıony brıtanııalyq Rebekka Edlıngtonnyń urlyq jasalǵannan keıin birneshe saǵattan soń urlanǵan medaldary qaıtarylǵan edi. Al onyń dosynyń avtokóligi sol kúıi urylarda ketken.
