Uıaly telefonmen qazaqtyń ulttyq oıyndaryn oınaýǵa múmkindik týdy

ASTANA. QazAqparat - Qazaqtyń ulttyq oıyny - toǵyzqumalaqty telefonǵa júktep, oınaýǵa múmkindik týdy. Bul týraly búgin L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov aıtty, dep habarlaıdy QazAqparat.

Aqordada ótken QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń kezekti otyrysynan keıin BAQ ókilderine suhbat bergen ýnıversıtet basshysy «Rýhanı jańǵyrý» baǵdarlamasy jastarǵa arnalǵanyn atap ótti.

«Baǵdarlama qolǵa alynǵannan keıin ýnıversıtettiń aqparattyq tehnologııany biletin talantty jastaryn jınap, qazaqtyń ulttyq oıyndaryn, sporttyq saıystaryn ınternettegi oıyndarǵa aınaldyrýdy usynǵan edim. Qazir kez kelgen adam telefonymen túrli oıyndardy oınaı alady. Al nege qazaqtyń ulttyq oıyndaryn ınternet oınyna aınaldyrmasqa? Bul usynysymdy jastar qoldady. Keshe ǵana jaqsy habar aldym. Qazir telefondaryńyzǵa toǵyzqumalaqty júktep, oınaı alasyzdar. Óte qyzyqty bolyp shyqty. Endi taıaý arada asyq atý enedi. Odan keıin qusbegilik, qansonar oıyn retinde engiziledi», -  dedi Erlan Battashuly.

Sonymen qatar, ol aldaǵy sáýir aıynda Elbasynyń «Rýhanı jańǵyrý» maqalasynyń jaryq kórgenine 1 jyl tolatyndyǵyn eske saldy.

«Osy ýaqyttyń ishinde ájeptáýir jumystar atqarylyp, kóp másele júıege kelgenin,  sanada úlken qozǵalys paıda bolǵanyna kýá bolyp otyrmyz. Búgingi komıssııa otyrysynda atqarylǵan jumystarǵa esep berilip, aldyǵa tyń mindetter qoıyldy. Anaý kúni Elbasy synǵa alyp, qasıetti jerler tizimine keıbir usaq-túıek dúnıelerdi kirgizýge bolmaıtynyn aıtqan edi. Osy turǵyda bizde qurylǵan sarapshylar keńesi atalǵan máselege jiti nazar aýdaryp, naqty usynystar berip otyratyn bolady», - dedi Erlan Sydyqov.